Një prej studentëve që vijojnë protestën prej 6 ditësh është Klodi Leka, i cili është shfaqur shpesh në protestat e studentëve.
I pyetur nga Politiko.al për mbështetjen që i ka dhënë PS në vitin 2012 (sot kërkon protestë të depolitizuar), ai ka reaguar duke thënë se nuk e mbështet PS-në.
“Unë nuk kam mbështet PS. Në atë vit kam pasur shoqe të ngushtë një vajzë (Maria Myridinas) që ka qenë kandidate për kryetare të FRESSH-it. Unë nuk kam qenë asnjëherë me asnjë parti politike. Ta them me sinqeritetin më të madh. Nuk dua të shpërndahen “fake news” sepse ndihem i rrezikuar. Kam 4 vjet që kundërshtoj ligjin për arsimin e lartë. Jam pjesë e Lëvizjes për Universitetin. 8 prej shokëve tanë janë dënuar me nga dy muaj burg për gjuajtjen me vezë ndaj Ramës”, shprehet Leka.
Për largimin e të rinjve të forumeve politike nga protesta, Klodi shprehet se janë keqkuptuar.
“Nuk jemi kundër atyre që janë në forumet e partive, jemi kundër personave që të nxitur nga partia dhe me urdhër prej tyre vijnë dhe mundohen të përçajnë studentët. Ulja e tarifave është një gjë e mirë edhe për ata, se janë student”, thekson Klodi.
Klodi paralajmëron kulmimin e protestës ditën e nesërme duke thënë: “Nesër do të jetë revolta më e madhe studentore, studentët do rikthehen sërish nga shtëpitë e tyre këtu në shesh. Nesër mendoj se do jetë goditja finale. Duhet t’i gjunjëzojmë si ministren dhe kryeministrin”.
