Protesta 7-ditore e studentëve për pak sa nuk ka marrë një goditje të rëndë mbrëmjen e sotme, kur është tentuar të bëhet diversion ndaj saj.
Emisioni “Opinion” i Blendi Fevziut kishte ftuar pikërisht disa studentë dhe një përfaqësi pedagogësh nga Universiteti i Tiranës. Por në pikun e diskutimeve dhe denoncimeve për atë që ndodh sot në universitetet shqiptare të kalbura nga korrupsioni dhe keqadministri, drejtuesi i emisionit, Blendi Fevziu bën një akt të padenjë.
Duke insistuar për vendosjen e dialogut me qeverinë, Fevziu përdor “asin nën mëngë” dhe i pyet studentët nëse janë gati të mirëpresin Ramën në studio… Një plan i qartë i kurdisur orë më parë për të futur studentët në “kurth” dhe për rrjedhojë duke tentuar përçarjen e tyre të cilët deri tani i kanë rezistuar joshjeve të politikës.
Por qëndrimi i studentëve është kurajoz dhe refuzojnë në mënyrë kategorike prezencën e Ramës në studio. Jo-ja e zgjatur e studentëve bën që Fevziu t’i kërkojë stafit të tij që të sqarojë Endri Fugën se se s’ka asnjë mundësi…
Jo-a e studentëve nuk vjen se kanë frikë nga debati me Ramën, por protesta tashmë është shndërruar në institucion dhe si e tillë askush nuk mund t’i fusë “pyka”, aq më pak Blendi Fevziu, ish-student i dhjetorit ’90. Fundja për këtë fakt nuk duhet ta tentonte këtë diversion.
