Organizata Botërore e Shëndetësisë ka publikuar statistika të reja, sipas të cilave, rrugët e Rusisë janë më vdekjeprurëset në Europë, ndërsa Norvegjia dhe Zvicra kanë rrugët më të sigurta.
Prej vitit 2016, raporti nënvizon se gjatë vitit në Rusi ka më shumë se 20 mijë viktima si pasojë e aksidenteve rrugore, mesatarisht 18 viktima për 100 mijë banorë. Nga kjo shifër, 23 përqind kanë si pasojë alkoolin.
Në BE, vendet e bllokut lindor kanë rekordet më të këqija për aksidentet rrugore me viktima, krahasuar me Europën Perëndimore dhe atë Veriore.
Edhe Shqipëria shfaq rekorde problematike, me 13.6 viktima për 100 mijë banorë, duke u renditur në klasifikim e gjashta, pas Rusisë që kryeson, Armenisë, Bosnjes, Gjeorgjisë dhe Ukrainës.
Sipas OBSH-së, pasuria e një vendi luan rol kryesor në statistikat për Europën, që tregojnë se një person është 3 herë më i predispozuar të humbasë jetën në një aksident rrugor në një vend me të ardhura mesatare, sesa në një vend me të ardhura të larta. Kjo, për shkak të një serie arsyesh, përfshirë ligjet më të dobëta mbi qarkullimin dhe infrastrukturën më të varfër.