Protestat masive të studentëve na kanë kthyer prapa në kohë, në vitin 1990. Revolta e këtij dhjetori është më masivja e 28 viteve të fundit. Ndër sloganet dhe thirrjet e studentëve në këtë protestë është edhe ajo “E duam Shqipërinë si gjithë Europa” e cila ka qenë motoja e demonstratave studentore të dhjetorit 1990. Koinçidencë? Të presim dhe të shohim!
Studentët e të gjithë fakulteteve në Tiranë, po protestojnë para Ministrisë së Arsimit ku kërkojnë uljen e tarifave të shkollimit. Të gjitha rrugët kryesore të kryeqytetit janë mbushur me studentë të cilët të vetëorganizuar nga të gjithë fakultetet e janë grumbulluar para Ministrisë së Arsimit.
Në bojkot sot janë: Studentet e Juridikut, Ekonomikut, fakulteti i Shkencave të Natyrës dhe UBT.
Studentëve të Tiranës u janë bashkuar dhe ata të Universitetit “Aleksandër Moisiu” të Durrësit, që janë mbledhur në Spitallë, ndërsa po protestojnë dhe studentët e Universitetit Fan Noli në qytetin e Korçës , dhe Aleksandër Xhuvani në Elbasan.
Takimi i djeshëm me Ministren e Arsimit Lindita Nikolla ka rezultuar i pafrytshëm, sepse konsistoi vetëm në premtime dhe në asnjë vendim të shkruar dhe masë të ndërmarrë konkretisht, për të anuluar së pari, pagesën prej 700 lekësh për çdo kredit të provimeve të mbartura.
