Nga Ilir Nikolla
*********************
Çfarë do qeveria “Rama”, një fund me dhimbje, apo një dhimbje pa fund. Heshtja e sotme nuk është strategji, është thjesht një konfuzion, i shkaktuar nga përmasa madhështore e protestës së studentëve në të gjithë Shqipërinë. Nesër do të jetë edhe radha e maturantëve, të cilët sipas VKM-së së Edi Ramës janë planfikuar si viktimat sakrifikale të radhës.
Pasnesër është 8 dhjetori dhe lejimi i protestave edhe në atë ditë është një risk që vetëm një politikan në konfuzion e ka “luksin” ta ndërmarrë.
Sjellja bipolare e qeverisë me studentët, pardje me kërcënime, dje me mashtrime e pastaj me zbythje e sot me një heshtje mortore, flasin qartë se protesta do të shndërrohet masive, por rrezikon edhe të shkojë në përplasje civile, për shkak të bipolaritetit të kryeministrit. Ai po rrëfehet i paaftë të marrë vendime, kur gjendet nën presionin e protestuesve. E ka dhënë këtë provë edhe në stinën e protestave për armët kimike.
Përsëritja e kësaj sjelljeje rrezikohet të sjellë pasoja të egra dhe afatgjata, si për kohezionin social në vend, por së pari për integritetin fizik të palëve të përfshira në përplasje.
Prandaj sa më shpejt, qeveria të përgjigjet, sepse do të ketë lehtësira. Të anullojë VKM-në e të hajë turpin me bukë, përndryshe, arma e rrugës mund të ketë pasoja më të forta.
Sa për fund, tentativa e zhurmimit të protestës përmes shfaqjes së kryeministrit në të gjitha ekranet, ndërsa përuronte për herë të n-të një hotel luksoz, ishte tentativa më e mjerë e ditës.
Zgjedhja e fundit të shpejtë ka lehtësira, pasi ajo e tmerrit pa fund është një zgjidhje bipolare, që prapë tek i njëjti fund të sjell.
