Ministrja e Arsimit Lindita Nikolla ka tentuar t’u përgjigjet thirrjeve të studentëve protestues, që kërkojnë anullimin e vendimit të qeverisë për tarifën shtesë vendosur mbi provimet e mbartura dhe po ashtu, përmirësimin e kushteve të banimit në godina.
Nikolla bëri një hyrje të gjatë që nuk kishte lidhje me thelbin e çështjes, duke iu sjellë në vëmendje studentëve sesi qeveria kishte hequr dorë nga “universitetet kioska” dhe më pas, iu rikthye krahasimit të tarifave që ishin vendosur nga viti 2009 – 2013 dhe atyre që u vunë në vitet 2013 – 2017.
Por, në vijim të ligjëratës, u detyrua të pranojë se vendimi që kishte ngritur studentët në protestë, pika 4 e tij më saktë, nuk kishte hyrë në fuqi dhe nuk prekte asnjë student. Gjithashtu, ajo nuk kishte veprim prapaveprues. Ajo tarifë shtesë për studentët do t’u rëndonte studentëve të vitit të ardhshëm akademik, jo të atyre që ishin aktualisht në shkollë.
Në këtë moment, Nikolla bëri një tërheqje që këtë pikë të VKM-së do ta propozonte të hiqej dhe t’u lihej në dorë universiteteve ta vendosnin vetë nëse do ta zbatonin.
Lidhur me kërkesën e studentëve për përmirësimin e kushteve të banimit në godinat e studentëve, Nikolla tha se janë dhënë disa milionë euro nnga donatorët dhe se në vijim do të punohet për përmirësimin e kushteve.
