Gjykata e Krimeve të Rënda ka lënë në fuqi masat e sigurimit personal për “çështjen Babale”.
Avokati i gazetarit Jetmir Olldashi ka kërkuar që Krimet të shpallin mos kompetencë për çështjen. Por, kërkesa u rrëzua nga gjyqtarja Liljana Baku.
Pas seancë avokati tha për mediat se nuk eksitojnë elementë të veprës penale për të cilën akuzohet klienti i tij. Ai tha se Jetmir Olldashi nuk ka lidhje me Fred Alizotin. Avokati Çlirimi Gjata zbuloi dhe detaje që prokuroria pretendoi gjatë seancës së sotme që u mbajt në këtë gjykatë:
“Prokuroria e quajti të papranueshme faktin që gazetari e çoi në PD, kasetën. Ç’do prokurori se ku e çon gazetari videon e tij, tek PD? Hoxha apo prifti? Më jep një rregullore të më thuash se ku duhet ta çojë gazetari. Pse nuk i përgjigjet prokuroria faktit si është marrë kampioni i zërit? Rruga është e gjatë”.
Ndërkohë, avokati i Fredi Alizotit tha se klienti i tij nuk është kunati i Albert Veliut, por nuk zbuloi çfarë lidhje kanë me njëri tjetrin. Gjithashtu ai mohoi të ketë lidhje mes gazetarit Jetmir Olldashi dhe klientit të tij.
Masat
Më 6 tetor, kjo Gjykatë dha masën e sigurisë për Albert Veliun dhe Fredi Alizotin, ndërsa dha detyrim me paraqitje për gazetarin Jetmir Olldashi. Masat u dhanë në përputhje me kërkesën e Prokurorisë.
“Arrest në burg” për shtetasin Albert Veliu, si i dyshuar për kryerjen e veprat penale të “Kallëzimit të rremë” dhe “Kalimit të paligjshëm të kufirit”.
“Arrest në burg” për shtetasin Fredi Alizoti, si i dyshuar për kryerjen e veprës penale të “Kallëzimit të rremë, në bashkëpunim”.
“Detyrim për t’u paraqitur në policinë gjyqësore” për shtetasin Jetmir Olldashi, si i dyshuar për kryerjen e veprës penale të “Kallëzimit të rremë, në bashkëpunim”.
