Deputeti i Partisë Demokratike, Ervin Salianji, i ftuar në studion e lajmeve në News24, akuzoi qeverinë Rama se e ka futur vendin në gjendje emergjence.
Ai tha se të gjitha denoncimet e PD kanë dalë të vërteta dhe se popullit i ka humbur besimi tek qeveria.
Lidhur me banorët e Astirit, Salianji tha se opozita do vazhdojë t’i mbështesë pasi janë në të drejtën e tyre.
Vendi paraqitet në një gjendje emergjence. Çfarë kemi denoncuar ka dalë e vërtetë. Është fatkeqësi për vendin pavarësisht rritjes së kredibilitetit për ne.
E kam theksuar sot dhe e ritheksoj që PD garanton qytetarët se do i kthejë sigurinë qytetarit. Që nga polici, te ministri e kryeministri do i kthejmë jetesën normale njerëzve.
Janë dekonspiruara denoncuesit, janë kërcënuar nga banditë sapo kanë folur me policinë. Këto janë skandale të përmasave ndërkombëtare e jo më për një vend të vogël si yni.
Qytetarët e dinë situatën se ku ndodhemi, dhe kanë mungesë besueshmërie se me këtë qeveri do ndryshojë diçka.
Pas denoncimeve ndaj Xhafaj, a do ishte mirë një test për Lleshajn?
“Ne nuk kemi bërë asnjë paragjykim për asnjë prej ministrave, ne kemi pasgjykuar pas punës që kanë bërë. Në Shqipëri vendoset në krye të ligjit, një njeri që ka shkelur Kushtetutën. Lleshi e ka shkelur Kushtetutën duke u refuzuar nga Presidenti, dhe duke vazhduar të jetë ministër. Ekziston shkelje kushtetuese. Çfarë mund të presësh nga një ministër që në urdhërat e parë jep mos të shkojnë policët në kafe. Këtu po bëhet nami me vrasje e drogë. Vrasja në Durrës apo në Bllok, nuk janë përfunduar si çështje. Janë përplasje bandash kokaine,” tha Salianji.
Protesta e banorëve
“Banorët janë në sakrificën e tyre sublime për të mbrojtur djersën dhe gjakun e vet. Kjo bëhet për të fituar në kurriz të tyre miliona euro. Banorët duhet të dëmshpërblehen, por Rama e ka kthyer në çështje personale këtë si luftë me banorët. Ai fillon merret me emra konkretë të personave që kanë ndërtuar në mënyrë të paligjshme aty. Atje nuk është një situatë politike, por jemi në mbështetje të banorëve, se për këtë paguhen deputetët,” u shpreh ai.
Situata mund të shkojë keq e më keq, çfarë parashikoni me këtë?
“Ato po shkojnë deri në vetëflijim. Është e tmerrshme se një 18-vjeçar nxënës i shkëlqyer, mbahet në burg”
Do keni ulje të gjakrave?
“Ne nuk duam ngritje gjakrash. Nëse dëmshpërblehen banorët me vlerën e tregut, gjë që zgjidhet. Por kur kryebashkiaku del si profet që thotë merrni cadrën kur bie shi, këto janë budalliqe me brirë që e bëjnë kryebashkiakun lojtar kur s’ka lojë”.
