Kryetari i LDK-së Isa Mustafa ka ngritur shqetësimin e tij se kryetari i Kuvendit, kryeministri dhe disa ministra po bëhen pjesë e projektit të ndarjes së veriut të Kosovës.
Mustafa ka thënë se Presidenti nuk është i vetëm në idenë e tij për korrigjim të kufijve, shkruan Periskopi.
Ky është reagimi i plotë i Mustafës:
Institucionet e vendit nuk po sillen me përgjegjësi ndaj gjendjes së krijuar në veri të vendit. Sjellja, veprimet dhe mosveprimet e Qeverisë dhe të Kuvendit, pa marrë parasysh se çfarë deklaron Kryetari i Kuvendit, Kryeministri dhe disa ministra, po bëhen pjesë e projektit të ndarjes së veriut të Kosovës. Po shihet qartë se Presidenti nuk është vetëm në idenë e tij për korrigjim të kufijve.
Është e papranueshme që për efekte populliste e të fushatës të rrezikohet integriteti territorial dhe ushtrimi i pushtetit në terë territorin e vendit. Institucionet e tilla të papërgjegjshme duhet të japin dorëheqje dhe të shpërndahen.
