Festat e Nëntorit duket se do të jenë të favorshme si ditë pushimi, pasi reshjet e shiut do t’i lënë vendin kthjellimeve.
Kjo e mërkurë solli ndërprerje të reshjeve të shiut, situatë e cila sipas Meteoalb do të vijojë edhe në ditët në vijim.
Thuajse në të gjithë territorin e vendit do të ketë më së shumti mot të kthjellët.
Megjithatë, po gjatë këtyre ditëve parashikohet edhe një rënie e konsiderueshme e temperaturave, të cilat kanë nisur të ndihen që këtë të mërkurë.
Pritet që temperaturat në zonat malore të arrijnë vlerat minimale minus 3 deri në minus 4 gradë, ndërsa në vendet e ulëta dhe në bregdet temperaturat do të variojnë nga 3 deri në 6 gradë ato minimale dhe deri në 17 gradë ato maksimale.
Sipas Meteoalb edhe ditët e para të muajit Dhjetor do të jenë kryesisht me mot të kthjellët, por me temperatura të ulëta.
