Deputeti i Partisë Demokratike, Klevis Balliu, tha se arrestimet e banorëve të ‘Astirit’, po bëhet për të trembur qytetarët për të mos dalë më në protestë. Balliu tha se arrestimi i dy protestuesve është bërë pasi rrëzuan hekurat e kantierit të vendosur nga kompania ‘Salillari’.
“Këto arrestime bëhen vetëm për një arsye, për të trembur qytetarët e Unazës së Re, për ti bërë presion atyre dhe familjarëve të tyre që ata të mos dalin të protestojnë për shtëpitë e tyre. Nuk ia kanë arritur dhe nuk do t’ia arrijnë sepse për çdo banor të kësaj unaze që ata do të arrestojnë, 1 mijë të tjerë do të shtohen. Arrestimi ka ardhur si pasojë e rrëzimit të disa hekurave të një biznesmeni Salillari. Të shembësh hekurat e Salillarit qenka krim i madh por të vrasësh, të presësh e të merresh me drogë nuk qenka aq problem sepse kemi me qindra vrasës që enden të lirë, kemi me qindra narkotrafikantë ende të lirë dhe disa prej tyre janë bërë edhe deputetë në Parlamentin Shqiptar. Ndërkohë që të protestosh për pronën tënde që e ke ndërtuar me djersë, me gjak, në rrugë të ligjshme, pasi ke paguar taksat e shtetit u fuske në burg”, u shpreh deputeti i PD-së.
Më tej, deputeti i drejtoi një mesazh kryeministri Rama. “Dhe një mesazh për Edi Ramën nga banorët e Unazës së Re që me këto lëvizje amatoreske nuk bën dot presion por hajde këtu dhe zgjidhi problemin këtyre qytetarëve sepse këtu nuk vendos as ti, as Erion Veliaj. Koha e bandave ka mbaruar dhe ka ardhur koha e qytetarëve. Hapi veshët dhe dëgjo qytetarët se ndryshe do të pijë e zeza”, tha Balliu.
