Nga Boldnews.al
Kryetari i Bashkisë së Tiranës, Erion Veliaj, e bëri edhe këtë-shfrytëzoi festën kombëtare për të krahasuar veten me Ismail Qemalin, në një shfaqje megalomania para një turme të përbërë nga freshistë dhe punonjës të institucionit që ai drejton.
“Lali Eri”, me shumë mundësi, do të dëshironte ta shihnin si “Skënderbeun e ditëve tona”, por këtë rol e ka marrë prej kohësh kryeministri Edi Rama. Ndaj, Veliaj duhet të kënaqet vetëm me rolin e themeluesit të shtetit shqiptar, Ismail Qemali.
Në ceremoninë e organizuar paraditen e së Mërkurës në Sheshin “Skënderbej”, kryetari i Bashkisë së Tiranës foli për “ismail-qemalistët” progresistë, ku përfshinte veten, si edhe për “dum-babistët” anakronikë që nuk lejojnë zhvillimin e Shqipërisë dhe kryeqytetit, ku natyrisht, këtë epitet ia adresoi opozitës dhe protestuesve të Unazës së Re.
“Ismail Qemali-tha Lali Eri-punoi për zhvillimin e Shqipërisë. Dumbabistët, lëvizja e xhonturqve shqiptare-, riktheu historinë Veliaj-synonte regresin e vendit”.
Natryrisht, ky “Ismail Qemal” i shekullit XXI e konsideroi parkimin nën sheshin “Skënderbej” si një arritje, e krahasueshme me ngritjen e flamurit në Vlorë. Ky “ismail-qemalist” i shtirur e krahasoi projektin korruptiv të Unazës së Re me rrugëtimin e plakut të Vlorës për të realizuar mbledhjen e bashkimit kombëtar shqiptar në vitin 1912.
Më shumë se 100 vjet nga shpallja e pavarësisë, shqiptarët, nëpërmjet medias së kontrolluar në pjesën më të madhe nga Rilindja dhe “Lali Eri”, tashmë janë të detyruar të ndjekin megalomaninë e socialistëve të rinj, të cilët edhe Ditën e Bashkimit Kombëtar, e ndajnë shoqërinë në “Ne” dhe “Ata”.
