Kryetrari i Partisë Demokratike, Lulzim Basha, ka prezantuar rinjve platformën qeverisëse të demokratëve sa i takon të rinjve.
Në forumin “Studentët për qeverisjen e mirë”, Basha ka paralajmëruar sërish anulimin e ligjit aktual të arsimit të Lartë dhe hartimin e një ligji të ri.
Basha tha se ligji i ri do të krijojë mundësi për të gjithë të rinjtë që duan të ndjekin universitetin pavarësisht mundësve ekonomike. Një tjetër pikë e programit, të cilën e bëri të ditur Basha, është ajo e stazhit të punës, ku 10 mijë të rinj në vit, të sapodiplomuar, do të kenë mundësi të bëhen pjesë e administratës me një pagesë nga shtetit për një periudhë prej 12 muajsh.
“Zgjidha e parë është një ligj i ri për arsimin e Lartë e cila së pari do të bëjë të mundur që çdo shqiptare dhe çdo shqiptar, i ri dhe e re, të ndjek studimet pavarësisht nëse ka mundësi familja. Që do të thotë, shteti, ashtu siç e ka në Kushtetutë, do të subvencionojë arsimin e Lartë publik dhe do të mundësojë që shqiptaret dhe shqiptarë të mos kenë më hallin e mos pagesës së tarifave universitare. Natyrisht me një sistem konkurrues i cili shpërblen performancën, jo një sistem parazitar.
Po kështu, e dyta që do të bëjmë, është programi i stazheve të punës për 10 mijë të rinj, me një vlerë fillestare prej 25 milionë eurosh, që do ti përgjigjet 10 mijë të sapodiplomuarve në një vit. Do të kenë një pagesë nga shteti me 300 mijë lekësh me stazh pune në një ambient pune që të mësojnë të hedhin hapat e parë në një mjedis krejt ndryshe nga universiteti, që është ambienti i punës”, u shpreh Basha.
