Nga Boldnews.al
Emrin e ka të bukur, domethënës për nga artikulimi, por PPP-të (Partneriteti Publik Privat), po kthehet në një piramidë të vërtetë, duke rrënuar jo më drejtëpërdrejtë qytetarët, por vetë shtetin. Vetëm për një vit, qeveria Rama ka lidhur kontratë për dhënien e rrugëve me konçension në vlerën e 1.2 miliardë eurove. Një shifër e çmenduar që shkon në arkën e pesë kompanive të lidhura me pushtetin e kryeqeveritarit.
Institucionet ndërkombëtare e kanë konsideruar këtë nismë një aferë të pastër dhe i kërkuan qeverisë sonë që të tregohet e kujdeshme me këtë skemë, që veç klientelizmit të dukshëm, mund të shkaktojë kosto finaciare të papërballueshme për një ekonomi si Shqipëria.
Në lidhje me administrimin e Programeve të Partneritetit Publik Privat, Guvernatori Genti Sejko u shpreh dje se është i nevojshëm përmirësimi i vazhdueshëm i kapaciteteve profesionale të njësive që administrojnë vlerësimin, kontraktimin dhe monitorimin e këtyre projekteve, sidomos sa i takon anës ligjore dhe financiare të tyre.
Nuk është I vetmi që e sheh me skepticizëm maninë e PPP-ve, pasi organizmat e huaj prej vitesh dhanë alarmin, por qeveria jo vetëm nuk u tërhoq, por këtë vit shkoi në çmendurinë e shekullit, ku për pesë akse rrugore do paguajë 1.2 milionë euro.
“Raportet e korrupsionit në prokurimin e qeverisë janë të zakonshme. Përdorimi në rritje i kontratave të partneritetit publik privat (PPP) ka ngushtuar mundësitë për konkurrencë, përfshirë edhe investitorët e huaj, në infrastrukturë dhe sektorë të tjerë. Analizat e dobëta kosto-përfitim dhe mungesa e ekspertizës teknike në hartimin dhe monitorimin e kontratave PPP janë shqetësime të vazhdueshme. Qeveria kishte nënshkruar më shumë se 200 kontrata PPP deri në fund të vitit 2017”-thuhet në raportin e fundit të Departamentit Amerikan të Shtetit. Por kjo shifër është shumëfishuar jo vetëm për nga numri, por vlera që po u shtrëngon gjithnjë e më shumë lakun mbi qytetarët.
Janë pesë rrugë të dhëna me konçesion që do i sjellin buxhetit pasoja gati katastrofike për vitet e ardhëshme ku brenda dhjetë viteve do të marrin 1.2 milionë euro. Rruga që kapërceu çdo rekord të mundshëm botëror është aksi Thumanë-Kashar, vlera e të cilit llogaritet 16.4 milionë euro për vetëm një kilometër rrugë. I gjithë aksi është fushor dhe nuk mund të përfytërohet që një mendje “brilante” pranë qeverisë të nxjerrë një kosto të tillë, dukshëm në aferë të dyshimtë.
Nuk mund të harrohen ato konçensione që ende zbrazin xhepat e shqiptarëve në sektorin e sëndetësisë gjatë mandatit të parë të qeverisë “Rama 1”. Ish-ministri Ilir Beqaj u kthye në personazhin më të përfolur për shkak të dhënies me konçesion të disa shërbimeve shëndetësore të përqëndruara në duart e vetëm dy kompanive. Si për ironi, kompania që ka marrë kontratën mbi 300 milionë euro në sistemin e shëndetësisë është e “specializuar” në tregtinë e duhanit, por në Shqipëri po merret me shëndetin e njerëzve.
Nga organizmat ndërkombëtarë u ngrit si shqetësim që dhënia me konçesion e punëve publike frenoi konkurrencën e ndershme. Fakti që asnjë kompani e huaj ndërkombëtare nuk është ofruar në këto tendera milionash shtoi edhe më shumë dyshimin e arsyetuar se vetëm një grup i vogel oligarkësh të lidhur me pushtetin përqëndruan në duar ekonominë e vendit dhe fondet publike. Shqipëria është kthyer në një treg të madh me PPP.
