Korrigjimi i kufijve Kosovë-Serbi po shqetëson edhe Malin e Zi. Presidenti malazez, Milo Gjukanoviç, apeloi që të bëhet kujdes për të mos krijuar precedentë. Duke folur për gazetën franceze “Le Figaro”, Gjykanoviç nënvizon gjithashtu pengimin e zhvillimit në Ballkanin Perëndimor.
Mali i Zi druhet se shkëmbimi i territoreve midis Kosovës dhe Serbisë mund të krijojë një efekt domino në rajon.
Presidenti malazez, Milo Gjukanoviç, bëri thirrje që me këtë çështje të bëhet kujdes dhe të mos krijohen precedentë.
Duke folur për gazetën franceze “Le Figaro”, Gjykanoviç tha se përparimi në të gjithë Ballkanin Perëndimor është i rrezikuar për shkak të tensionit të krijuar nga negociatat e reja midis presidentëve të Kosovës dhe të Serbisë.
“Kjo temë ka qenë tabu për kohë të gjatë sepse kujton përvojën e hidhur të viteve ’90. Pas përfundimit të luftërave, në rajon është folur më shumë për multikulturalizmin dhe demokracinë multientike. Por tani kryeqytetet perëndimore kanë ndryshuar mendim,” tha ai.
Kreu malaz u shpreh i shqetësuar se përkeqësimi i marrëdhënieve midis Serbisë dhe Kroacisë mund t’u hapë rrugën mbështetësve të ‘Serbisë së madhe’.
“Disa prej tyre kanë nisur përsëri të vënë në dyshim pavarësinë e Malit të Zi, duke pretenduar se Serbia ka të drejtë natyrore mbi Malin e Zi. Kjo është retorikë e rrezikshme,” tha Gjukanoviçi.
