Pas emërimit në postin e zv.ministrit të Brendshëm, por me atributet e ministrit, Sandër Lleshaj u rendit në faqen e kryeministrisë mes ministrave, në vend të Fatmir Xhafajt vetëm një ditë pas shkarkimit të tij në një seancë jashtë rendit në Parlament.
Megjithatë, pesë ditë më vonë një tjetër ndryshim bie në sy sapo hap faqen online të kryeministrisë. Siç edhe duket, mes ministrave “është rikthyer në detyrë” Fatmir Xhafaj, i cili mban postin e ministrit të Brendshëm, ndonëse javës që kaloi u shkarkua me votat e mazhorancës.
Megjithatë, faqja i ‘bën lëmsh’ të gjithë sapo tenton të klikosh mbi CV e Xhafajt, pasi në brendësi rezulton materiali përshkrues i karrierës së Sandër Lleshajt, aktualisht i emëruar si zëvendësministër i Brendshëm.
Kujtojmë se presidenti Ilir Meta nuk ka pranuar ta dekretojë propozimin e Edi Ramës për emërimin e Lleshajt, madje ky propozim është dërguar për të dytën herë nga Rama në presidencë.