Asnjë hap pas nga Bashkia e Tiranës dhe qeveria lidhur me projektin e Unazës së Madhe që dëmton rreth 400 godina, familje dhe biznese në zonën e Astirit në kryeqytet.
Madje sot ka nisur të zbatohet edhe më konkretisht plani, pasi është hequr dhe simboli i Shqiponjës, për t’u hapur rrugë punimeve.
Banorët janë të vendosur në protestën e tyre, ata kanë dalë sot për të tetën ditë me radhë në rrugë, duke bllokuar kalimin e mjeteve. Nuk kanë munguar as tensionet mes tyre dhe drejtuesve të mjeteve, të cilët kërkojnë të kalojnë rrugën, pavarësisht barrikadës njerëzore që kanë ndërtuar banorët.
Në përplasjen mes drejtuesve të mjeteve dhe banorëve ka mbetur i lënduar dhe një prej operatorëve të mediave, ndërsa në vendngjarje nuk ka asnjë punonjës policie për të bërë të mundur neutralizimin e situatës. Banorët thonë se kanë marrë urdhër të lejohen të kalojnë vetëm ambulancat, ndërsa kërkojnë mbështetjen e të gjithë banorëve të kryeqytetit. ”Të gjithë për një qëllim”, është motoja e banorëve. Ndërkohë protestës i janë bashkuar dhe deputetët e PD-së Flamur Noka, Orjola Pampuri dhe Klevis Balliu.
‘’Dy makina qe erdhën ishin provokacion i shtetit, po na kërcënonin dhe me armë, duket se kërkonin. Ishte tentativë e pastër për të na frikësuar”, shprehet një nga banorët.
Zgjidhja e vetme që iu është dhënë banorëve është pagimi i qerasë nga ana e bashkisë për një vit, një propozim të cilën ata njëzëri e kanë konsideruar qesharak, pasi sipas tyre mundi dhe djersa me të cilën kanë ndërtuar banesat, po hidhet poshtë brenda një dite.
“Vetëm gjaku e ndan këtë punë, ftoj opozitën që të na përkrahë, ndryshe të distancohet dhe të mos vijë fare këtu. Këtu ishte Edi Rama, këtu ishin qeveritë e mëparshme, na fërkuan shpinën dhe na thanë që banesat do të legalizoheshin”, shprehet një prej banorëve.
