Pavarësisht se jemi në prag të një sezoni dimëror që shtrihet deri në pranverën e 2019-ës dhe i cili sipas meteorologëve do të shoqërohet me shira të shumtë, qeveria shqiptare ka ndërmarrë një hap ne dukje absurd dhe sabotues, për sa i përket Emergjencave Civile.
Në një pasqyrim që i ka bërë ndarjes së fondeve për vitin që vjen “shqiptarja. com” shkruan se është i pashpjegueshëm një pakësim fondesh në masën 36.4 për qind në sektorin e Emergjencave Civile, drejtori që mbulohet nga Ministria e Mbrojtjes, e cila vetë si institucion do ketë një rritje me 6.1 për qind në krahasim me vitin e kaluar.
Është fakt se veçanërisht vitet e fundit Shqipëria ka përjetuar situata të vështira, si pasojë e përmbytjeve të mëdha nga reshjet. E njëjta situatë pritet edhe këtë fundvit dhe fillim-vitin e 2019 sipas specialistëve të fushës. Por kjo nuk është marrë parasysh nga qeveria, e cila si duket se në një situatë të rënduar financiare ka shkurtuar në mënyrë drastike fondet (edhe aq sa ishin, të pamjaftueshme) për Emergjencat Civile.
