Ish-ministri i Brendshëm Saimir Tahiri, është rikthyer pas 1 viti në studion e “Opinion”, në Televizionin Klan. Pas një heshtje të gjatë dhe mungese në studiot televizive, pavarësisht se emri i tij ka qenë pjesë e lajmeve gjatë të gjithë vitit, Tahiri tha se sot do të ishte në burg, ndonëse pa asnjë provë, nëse Parlamenti nuk do të votonte kundër kërkesës së prokurorisë për arrestimin e tij.
“E vërteta nuk e bën xhiron e gënjeshtrës…Dhe as me shpejtësinë me të cilën vrapon gënjeshtra, por unë kam besuar se sidoqoftë e vërteta shkon tek veshi i njerëzve edhe sikur të mos duan, edhe sikur të vonohet nuk ka rëndësi. Ju kujtoj që në mos ndodhte që parlamenti të mos miratonte kërkesën për arrestim, unë deri sot do të isha në burg pa asnjë diskutim, do të isha në burg, pavarësisht se pa asnjë fakt, pa asnjë provë, unë do të isha në burg”, tha Tahiri.
Duke iu përgjigjur pyetjes së Fevziut, për përjashtimin e tij nga grupi parlamentar i PS, Tahiri tha se do të preferonte të dënohej, sesa të pranonte kushte, qoftë edhe nga partia.
Blendi Fevziu: Të gjithë ata që kanë bërë atë që thoni, kanë kundër reaguar e sulmuar, kanë patur mbështetjen e partisë, i kanë patur krahët… Ndërkohë që partia juve ju lëshoi, ju nxorri jashtë, me shumë stil ju përjashtoi nga grupi parlamentar dhe ju la të notonit apo të lundronit i vetëm. I vetëm nuk është shumë kollaj t’iu përgjigjesh këtyre.
Saimir Tahiri: Termi që partia të lëshoi mua as më ngroh dhe as më ftoh. As që e dua partinë për të vërtetën time. Ndoshta juve ju duket si batutë për ta thënë në televizor, por unë e thashë edhe në fjalim që do preferoja dënimin, sesa lirimin me kusht. Qoftë dhe kushtet nga partia, në të cilën unë kam shërbyer dhe angazhuar bashkë me shumë të tjerë. Dhe këtë e them sepse unë nuk besoj që një drejtësi është e plotë, në rastet kur kjo afektohet nga pushteti apo marrëdhëniet të cilitdo lloj.
E thashë pse kam heshtur sepse ka një motiv dhe për t’iu shpjeguar që nuk ka asnjë mllef në atë që thashë sot. Por edhe nëse do të kisha mllef, do të isha i justifikuar. Por nuk kam mllef, kam vetëm arsye.
Tahiri për ish-kreun e Policisë së Vlorës
Në mesin e personave të akuzuar si bashkëpunëtor me grupin e Habilajve, e që vijon të jetë ende në kërkim është edhe ish-drejtori i policisë së Vlorës, Jaeld Çela. Pikërisht për këtë të fundit, Tahiri tha se besonte që ai ishte i pafajshëm, megjithatë nuk duhet të ishte larguar dhe duhet të ishte përballur me drejtësinë.
Saimir Tahiri: Do të preferoja që askush të mos i ikë drejtësisë dhe nuk do të preferoja kurrë që të ishte në kërkim. Kanë qenë drejtues të policisë, i pari se dy të tjerët nuk kanë qenë.
Blendi Fevziu: Ajo është piramidë pastaj, se ai emëron të tjerët.
Saimir Tahiri: Kam shpresuar që ai të sillej si qytetar. Ka qenë drejtues dhe duhet të shkonte të përballej me drejtësinë, edhe në qoftë se drejtësia ia ka futur kot. Ka punuar me mua si të gjithë drejtorët në Policinë e Shtetit. Unë besoj që është i pafajshëm. Në qoftë se ka prova prokuroria për fajësinë e tij do të më vijë shumë keq se ka abuzuar me besimin tim.
Blendi Fevziu: Ju e besoni që është i pafajshëm. Ai vetë e quan veten të fajshëm kur largohet, se një i pafajshëm rri dhe thotë që jam gati të përballem me drejtësinë.
Saimir Tahiri: Unë po të them mendimin tim, se çfarë mendon ai dhe ti është tjetër gjë.
