Skandalet që i plasin njëri pas tjetrit e kanë detyruar Edi Ramën që të bëjë një ligji për të mbrojtur deputetët e tij nga denoncimet dhe arrestimet.
Ditët e fundit është mësuar se një deputet i Edi Ramës është pranë prangave dhe për këtë kreu i Rilindjes ka marrë vendime për të mos u arrestuar.
Shumica parlamentare është ngërthyer kohët e fundit në një sërë ndryshimesh që shkojnë në njëjtën pikë: Forcimin e imunitetit të deputetëve për të mos u arrestuar.
Agjensia BIRN, një media investigative që paguhet me paratë e taksapaguesve shqiptarë, sot ka bërë publike një manovër të mbajtur në hije të Byrosë së Kuvendit të Shqipërisë, që krijon mbrojte të veçantë ligjore për deputetët ndaj të cilëve kërkohet kontrolli i banesës ose privimi i përkohshëm i lirisë.
Në dokumentin e titulluar: ‘Udhëzuesi i Detajuar për Sjelljen në Kuvend’, hidhen dyshimet se kërkesa e prokurorisë për arrestimin e një deputeti mund të përbëjë edhe komplot për të krijuar destabilitet gjë që cenon pavarësinë e Kuvendit.
Edi Rama duket se shikon komplote kundër tij në çdo lëvizje dhe denoncim që bëhet për qeverinë dhe deputetët e mazhorancës.
Ky dokument, i votuar nga shumica socialiste në shtator, përbën në thelb një interpretim të ‘kodit të sjelljes’ të miratuar në prill 2018, i cili sanksiononte se deputeti nuk duhet të abuzojë me imunitetin parlamentar, duke e përdorur atë për të penguar një arrestim të mundshëm.
Por 6 muaj më pas socialistët po e kthejnë pllakën duke servirur një interpretim në mënyrë krejt të ndryshme. Kjo nuk është tentativa e parë e Ramës për të forcuar koracat mbrojtëse për njerëzit e tij, që janë të përfshirë në skandale të një pas njëshme.
Në janar të këtij viti, kreu i grupit parlamentar socialist Taulant Balla, propozoi një amendim në rregulloren e Kuvendit me argumentin se procedura e heqjes së imunitetit ndaj arrestit ishte e paqartë. Sipas ndryshimit të propozuar, Prokuroria duhet të shoqërojë kërkesën për lejim arresti me ‘prova’ ndërsa Kuvendi (d.m.th. shumica parlamentare) fiton të drejtën të gjykojë mbi vlefshmërinë e provave.
Socialistët duket se u tërhoqën nga propozimi pas kritikave të opozitës, e cila e shpalli atë një nismë që synon ta kthejë kreun e shumicës parlamentare në gjykatës të provave të prokurorisë. Por me sa duket tërheqja paska qenë taktike dhe ajo po ringjallet në një formë tjetër.
Ndryshimet e bëra në mënyrë të fshehtë nga Edi Rama:
Kodi i Sjelljes së Kuvendit mbi imunitetet thotë:
Kufizimi i imunitetit
1. Deputeti nuk duhet të përfitojë nga imuniteti i tij për të penguar veprimet e drejtësisë për të kërkuar arrestin, heqjen e lirisë në çfarëdolloj forme, ose ushtrimin e kontrollit personal të banesës për kryerjen e një krimi të rëndë, përfshirë korrupsionin dhe shpërdorimin e detyrës.
Komentari mbi Kodin e Sjelljes së Kuvendit mbi imunitetet thotë:
‘Ky mekanizëm procedural është mbrojtje e veçantë ligjore, kur ndaj tyre kërkohet masa e arrestit, heqja e lirisë në çfarëdolloj forme, ose ushtrimi i kontrollit personal të banesës nga organi i akuzës dhe që shërben si filtër i verifikimit, nëse kërkesa synon presionin, destabilizimin, ose cenimin e pavarësisë së institucionit.
Dispozitat procedurale, që parashikojnë rregullat dhe mënyrën e shqyrtimit dhe lëshimit të autorizimeve për kufizim të të drejtave të deputetit, kanë si qëllim që, nëpërmjet procedurave, të verifikohet nëse kërkesat e paraqitura nga organe që përfaqësojnë pushtete të tjera të pavarura, synohet ose tentohet që nëpërmjet goditjes së individit, të dëmtohet ose t? preket funksionimi normal dhe pavarësia e institucionit.
