Prokuroria Publike e Stambollit njoftoi se gazetari saudit Jamal Khashoggi është vrarë në sipas një plani të parapërgatitur, duke u mbytur sapo ka hyrë në Konsullatën e Arabisë Saudite në Stamboll më 2 tetor, ndërsa më pas kufoma e tij është zhdukur duke u copëtuar, transmeton Anadolu Agency (AA).
Prokuroria Publike e Stambollit ka publikuar një deklaratë me shkrim në lidhje me hetimet për vrasjen e gazetarit të Washington Post Jamal Khashoggi në Konsullatën e Arabisë Saudite në Stamboll, si dhe për vizitën e kryeprokurorit saudit Saud al-Mojeb në Prokurorinë Publike të Stambollit.
“Në këtë takim është deklaruar se gazetari Jamal Khashoggi është vrarë në territoret e Republikës së Turqisë dhe se sipas legjislacionit të Republikës së Turqisë dhe parimeve të përgjithshme të së drejtës universale, autoriteti për hetime dhe juridiksion i përket gjykatave të Republikës së Turqisë. Është përsëritur kërkesa për ekstradim të të dyshuarve të cilët është njoftuar se janë arrestuar në Arabinë Saudite”, tha prokuroria.
“Në të njëjtin takim, kryeprokurori arab dhe delegacioni, janë pyetur për lokacionin e kufomës së Khashoggit, a ka ndonjë gjetje të zbuluar në kuadër të hetimeve të tyre për fazën e planifikimit të aktit të vrasjes së Jamal Khashoggit, i cili në bazë të hetimeve të zhvilluara nga Prokuroria jonë Publike është zbuluar se është vrarë në mënyrë të planifikuar se kush është personi i cili në opinionin publik është reflektuar si ‘bashkëpunëtor vendas’, dhe këto pyetje në të njëjtën ditë u janë dërguar edhe në mënyrë të shkruar. Delegacioni i Arabisë Saudite më 30 tetor 2018 përsëri realizoi vizitë në Prokurorinë Publike dhe edhe në këtë takim atyre u janë drejtuar pyetjet e njëjta dhe është theksuar se ende priten përgjigjet e këtyre pyetjeve. Kryeprokurori i Arabisë Saudite tha përgjigjet për këto pyetje do të jepen brenda ditës së njëjtë”, thuhet më tej në deklaratën e prokurorisë.
Në përgjigjet e dorëzuara në formë të shkruar më 31 tetor nga kryeprokuroria saudite, kryeprokurori i Stambollit Irfan Fidan dhe delegacioni shoqërues janë ftuar së bashku me dëshmitë e siguruara në kuadër të hetimeve të vizitojnë Arabinë Saudite.
Po ashtu, në deklaratë thuhet se autoritetet saudite nuk kanë dhënë sqarim në lidhje me praninë e bashkëpunëtorit vendas në vrasjen e Khashoggit.
“Përkundër përpjekjeve qëllimmira për zbulimin e së vërtetës, nga takimet nuk është arritur ndonjë rezultat konkret”, thuhet në deklaratë.
“Viktima Jamal Khashoggi në datën 2 tetor 2018 është vrarë sipas një plani të parapërgatitur, duke u mbytur posa ka hyrë në konsullatën e Arabisë Saudite në Stamboll, ku kishte shkuar për procedura martesore”, tha prokuroria.
“Kufoma e tij, përsëri në bazë të një plani të parapërgatitur, është zhdukur duke u copëtuar pasi është mbytur”, thuhet më tej në njoftimin për opinionin publik.
Sipas deklaratës, hetimet janë duke vazhduar me të gjitha dimensionet e saj.
