Kryetari i Grupit Parlamentar të PD, Edmond Spaho ka përsëritur idenë e kryetarit Basha që zgjedhjet lokale të Qershorit të mbahen së bashku ato parlamentare.
I ftuar në rubrikën ‘Opinion’, në Neës 24, Spaho u shpreh se PD është e mobilizuar maksimalisht që të dalë e fituar, edhe pse dyshon se kryeministri Rama do të tentojë blerjen e tyre.
“Partia Demokratike ka ngritur shtabe elektorale në bashkitë e vendit. Edi Rama është ideatori dhe zbatuesi i manipulimit të zgjedhjeve. Pse ju mendoni se kjo qeveri jep garanci për zhvillimin e zgjedhjeve të lira dhe të ndershme, por Partia Demokratike nuk do të lejojë që të kemi më zgjedhje farsë. Zgjedhjet parlamentare dhe ato vendore të mbahen bashkë, është një opsion. Përpara se të arrijmë në zgjedhje vendore apo të përgjithshme së bashku, së pari duhet të garantojmë zgjedhje të lira”, sqaroi Spaho.
Në fund, ai shtoi se kjo klikë duhet të çmontohet, dhe më pas do të hyhet në zgjedhje normale dhe të ndershme.
