Deputetja e Partisë Socialiste, Elisa Spiropali ka komentuar një nga çështjet më të debatuara ditën e fundit, largimi i Fatmir Xhafajt nga posti i ministrit të Brendshëm dhe zëvendësimi i tij me Sandër Lleshin.
E ftuar në emisionin “Kafein”, Spiropali ka komentuar largimin e Xhafajt si diçka krejt normale.
“Arsyet i dha vetë zoti Xhafaj. Ai iku me nder, bëri një punë të mirë, me disa rezultate të dukshme dhe është normale që vjen një kohë kur ka nevojë edhe për zëvendësime. U largua me lirinë e tij të plotë në një kohë të caktuar, për të ruajtur dinjitetin e tij. Sa i takon akuzave për vëllain e tij, Agron Xhafaj, do dalin hetimet e Prokurorisë dhe qeveria paralelisht do të vijojë punën. Nuk ka asgjë të çuditshme të ndryshohen ministrat në qeveri. Traseja e shtuar në luftën kundër krimit dhe aksionet do vijojnë edhe me zotin Lleshin”, u shpreh Spiropali, e cila hodhi poshtë edhe qëndrimet e kreut të PD, Lulzim Basha për largimin e Xhafajt.
“E sigurt se arsyet nuk janë ato që trumbeton Basha, ‘e larguam ne, lufta jonë e paepur, solli largimin tij’”, u shpreh Spiropali.
