Vrasja e minoritarit grek në Bularat të Gjirokastrës, Konstandinos Kacifas, ka ngjallur reagime të ashpra nga politika greke. Partia “To Potami”, kërkon që shteti shqiptar të japë llogari për vrasjen e 35-vjeçarit, gjatë shkëmbimit të zjarrit me policinë.
Kjo parti kërkon që policia shqiptare të përgjigjet, për rrethanat që shkaktuan vrasjen e Kacifas.
“Ajo që është kryesore për tu sqaruar, është nëse policia i dha mundësi Kacifas që të dorëzohet. Pala shqiptare është e detyruar që të japë përgjigje bindëse dhe të detajuara”, thuhet në deklaratën e partisë greke.
I riu grek mbeti i vrarë pasditen e kësaj të diele gjatë shkëmbimit të zjarrit me policinë, teksa ishte i rrethuar.
Gjithçka pasi më herët ai kishte qëlluar në ajër në fshat dhe më tej kur policia ishte vënë në ndjekje, kishte shkrepur armën dhe ndaj uniformave blu.
Kacifas prej pak ditësh ishte kthyer në Gjirokastër pasi jetonte në Athinë. Ai ishte i divorcuar dhe kishte një vajzë 13 vjeçe.