Arben Ahmetaj ishte i ftuar dje në emisionin ‘Open’ për të folur mbi vendimin e qeverisë për mbylljen e pikave të basteve dhe kazinove elektronike. Ahmetaj është i vetmi ministër në qeverinë e Edi Ramës që ka marrë së fundmi ‘lejen’ për t’u shfaqur në një studio televizive, pasi kolegët e tij kanë një kohë të gjatë që nuk përballen me kundërshtarët politikë apo gazetarët.
Ndonëse skandalet dhe akuzat politike kanë qenë të shumta pothuajse për të gjithë ministrat e kabinetit, kryeministri Rama ka vendosur të mbrohet me zv/ministrat.
Kjo taktikë është zgjedhur kryesisht për Ministrinë e Brendshme, ku Fatmir Xhafaj ka vetëm një dalje publike më 24 shtator në ‘Real Story’, në Vizion Plus. Ndërkohë, përgjatë një muaji kanë qenë katër zv/ministrat Besfort Lamallari, Julian Hodaj, Rovena Voda dhe Romina Kuko që kanë përfaqësuar këtë institucion në përballjet me gazetarët dhe kundërshtarët politikë në emisionet më të ndjekura në Shqipëri.
Edhe ministrja e Drejtësisë, Etilda Gjonaj ka nxjerrë zëvendësen e saj, Teuta Vodën, për të folur për zhvillimet e fundit, siç ishte prania e saj në emisionin ‘Debat’ në Channel One.
Ministria e Arsimit u trondit pak javë më parë nga skandali ku ishte përfshirë ish-zv/ministri Ervin Demo, i cili rezultoi se kishte kryer plagjiaturë në disa shkrime të publikuara në revistat e huaja. Pjesë e këtij skandali u bë edhe deputetja e PS, Blerina Gjylameti.
Por pavarësisht akuzës, Lindita Nikolla jo vetëm që nuk foli publikisht, por nxori Demon për të uruar studentët për fillimin e vitit të ri akademik. Pak ditë më pas, Ervin Demo u detyrua të njoftonte dorëheqjen nga posti i zv/ministrit.
Ministria e Jashtme ka promovuar gjithnjë e më shumë zv/ministrin Gent Cakaj në daljet publike, ku për herë të fundit ka qenë i ftuar në ‘Ora Neës’ më 11 tetor, ndërkohë që daljet e ministrit Ditmir Bushati në studio pothuajse nuk ekzistojnë.
Akuza të forta politike ka patur edhe ndaj ministrit të Infrastrukturës, Damian Gjiknuri dhe ministres së Shëndetësisë, Ogerta Manastirliu, por asnjë prej tyre nuk ka dalë në konferenca apo studio televizive për të dhënë shpjegime.
Sa i përket ministrave të tjerë, Olta Xhaçka, Blendi Klosi, Mirela Kumbaro, Niko Peleshi, Pandeli Majko dhe Sonila Qato, ata kanë kohë që janë ‘zhdukur’ nga studiot e emisioneve./politiko.al/
