Kryetari i opozitës, Lulzim Basha ka paralajmëruar sot Prokuroren e Përgjithshme të përkohshme, Arta Marku dhe Drejtuesen e Prokurorisë së Krimeve të Rënda, Donika Prela, që të marrin si të pandehur, Vangjush Dakon.
Sipas Bashës, Marku dhe Prela do të mbajnë përgjegjësi në rast se po manipulojnë provat për Dakon, Ballën, Gjiknurin dhe Tahirin.
Sipas Bashës, Vangjush Dako pranoi publikisht se ka bashkëpunuar me bandat gjatë zgjedhjeve të shkuara.
“Tashmë është e qartë për këdo se Edi Rama ka patur një plan të mirëmenduar e të shtrirë anembanë vendit, për bashkëpunim me krimin për të vjedhur zgjedhjet. Duhet urgjentisht një hetim i posaçëm dhe i pavarur për këtë operacion kriminal.
Vangjush Dako është i pari që duhet të merret i pandehur. Lënia e tij i lirë edhe pasi pranoi mbrëmë publikisht bashkëpunimin me bandat për të dhunuar zgjedhjet, është shkatërrim i demokracisë dhe vdekje e drejtësisë.
Dua t’i kujtoj Donika Prelës dhe Arta Markut se dëmtimi i provave dhe manipulimi i hetimeve për krimet elektorale të Dakos, Ballës, Gjiknurit, Tahirit e të tjerë, është veprim i rëndë kriminal për të cilën ato do të mbajnë shpejt përgjegjësi deri më një. Kur prokuroria mbron krimin, ka rënë shteti”, shkruan Basha.
