Një nga gjërat më tërheqëse të Champions League është mundësia e kryqëzimit mes së shkuarës, së tashmes dhe së ardhmes të futbollistëve. Mjafton të mendojmë për kthimin e Ronaldo-s në Mançester, Pogba që përballet me Juventus, Icardi që kthehet në Barcelonë. Përballje që të gjitha knë jetuar ose do të jetojnë si protagonistë, ndryshe nga sa ka bërë Oleksandr Zinchenko. Mesfushori i Manchester City është kthyer në Ukrainën e tij me skuadrën e Guardiola-s, që ka mundur në transfertë Shakhtar. Ylli i ri i “Qytetarëve” nuk shpresonte të luante nga minuta e parë, por gjithsesi kishte ftuar gjithë familejn në stadium, duke blerë plot 26 bileta. Ndoshta duhej të kishte blerë një më shumë.
TË GJITHË NË TRIBUNË – Ndoshta jo, sepse City nuk i lë lojtarët që shkojnë në tribunë që ta paguajnë vetë biletën. Por, siç ka bërë të ditur “Daily Mail”, kthimi i lavdishëm në shtëpi i Zinchenko-s (ka qenë një lojtar i moshave të Shakhtar për gjashtë vite) nuk ka shkuar siç shpresonte ai. Ai është grumbulluar dhe ka shkuar në Ukrainë me skuadrën, por rregullat e Champions-it janë të qarta: 18 lojtarë mes fushës dhe stolit. Kështu, pavarësisht se Pep e ka aktivizuar shpesh si mbrojtës krahu për shkak të dëmtimeve të Delph, i cili është rezerva e Mendy, ukrainasi nuk ka qenë pjesë e listës së 18 lojtarëve dhe ka qenë i detyruar të ulet në tribunë, shkruan telesport.
ME FAMILJEN – Një situatë kjo që nuk mund të anashkalohej nga rrjetet sociale kur kanë mësuar se Zinchenko ka ftuar të gjithë familjen e tij… për asgjë. Ka patur nga ata që kanë korrigjuar lajmin: “26 biletat ishin për familjen dhe miqtë”, ndërsa të tjerë kanë kërkuar ta ngushëllojnë, duke i kujtuar se të paktën ka patur mundësinë të ulet me të afërmit e tij. Një fakt ky që, me shumë mundësi, nuk duhet të ketë mjaftuar për të shëruar plagën e një kthimi zhgënjyes në shtëpi. Dhe nëse Guardiola do të vazhdojë ta injorojë mesfushorin, Ancelotti, që e vlerëson shumë, mund të përfitojë që në janar…
