Nga Boldnews.al
Kryeministri Edi Rama u detyrua “të shesë” bashkëpunëtorin e tij, Arben Çuko, i cili u kap mat në përgjimet e Prokurorisë për Krime të Rënda, për përfshirje në korrupsion. Arrestimi i ish-deputetit dhe ish-drejtorit të Përgjithshëm të Burgjeve u realizua pasditen e së dielës, më 21 Tetor 2018.
Rama deklaroi në një status në rrjetet sociale: “Keqardhje për A.Çukon, po për ne s’ka dy qëndrime në raport me ligjin,ka vetëm një;s’ka dy qasje në raport me drejtësinë, ka vetëm një;s’ka dy fytyra në raport me qytetarët, ka vetëm një…”!
Por, saktësisht një vit më parë, më 21 Tetor 2017, me urdhër të kryeministrit Edi Rama, anëtarët socialistë në Këshillin e Mandateve dhe Imuniteteve rrëzuan me votë politike kërkesën e Prokurorisë për Krime të Rënda për autorizimin për arrestimin e ish-ministrit të Brendshëm, Saimir Tahiri.
Saimir Tahiri, që prej asaj kohe, vijon të jetë ende si person nën hetim, i dyshuar për bashkëpunim me narko-trafikantët Habilaj, kushërinj të tij. Ish-ministri i Brendshëm rezulton të jetë i vetmi person i përfshirë në këtë hetim, i cili vijon të shijojë lirinë dhe të përcjellë mesazhe të koduara herë pas here, nëpërmjet rrjeteve sociale.
Moisi Habilaj, kreu i grupit kriminal, është i arrestuar në Itali, ku po ndjek procesin ndaj tij në Gjykatën e Katanias. Vëllezërit e tij, njëkohësisht bashkëpunëtorë të ngushtë në narko-trafik, Artan dhe Florian Habilaj janë shpallur në kërkim nga autoritetet shqiptare dhe ndaj tyre ka një masë sigurimi “arrest me burg” në fuqi.
Anëtarë të tjerë të bandës Habilaj janë të arrestuar dhe presin gjykimin në Katania të Italisë. Drejtuesit e lartë të Policisë së Shtetit, Jaeld Çela, Gjergj Kohila dhe Sokol Bode, të cilët akuzohen nga prokuroria shqiptare për bashkëpunim me Habilajt janë në kërkim dhe ndaj tyre është në fuqi masa e sigurisë “arrest me burg”.
Pra, vetëm Saimir Tahiri vijon të jetë i lirë dhe i pashqetësuar. Habilajt dhe “ushtarët” e tyre, të gjithë qytetarë të thjeshtë, po përballen me drejtësinë nën masa sigurimi apo të shpallur në kërkim. Ndërkohë që ish-ministri Tahiri shfaqet në mënyrë periodike publikisht, herë duke notuar, herë mbi kal e herë duke soditur natyrën, i patrazuar.
Prokuroria shqiptare, e cila tashmë drejtohet nga Kryeprokurorja e Përkohshme Arta Marku dhe vartësja e saj tek Krimet e Rënda, Donika Prela, nuk ka avancuar me hetimet për ish-ministrin e Brendshëm. Madje, me veprime jo-ligjore, kanë arritur të dobësojnë ndjeshëm hetimin, duke penalizuar prokurorët që po ndiqnin hetimin ndaj tij.