Gjykata e Tiranës ka dhënë masën e sigurisë ‘arrest me burg’ për këngëtarin Arkimed Lushaj, i njohur ndryshe si “Stesi”, pasi dyshohet si i përfshirë në një grup kriminal.
Stresi u arrestua dy ditë më parë në një hotel në zonën e Linzës në kryeqytet pasi u kap me armë dhe kokainë.
Sipas burimeve emri i “Stresit” ka dalë gjatë hetimeve për bandën e “Bajrave” ku këngëtari kishte kërkuar ndihmë për ta nxjerrë jashtë shtetit pasi po kërkohej nga policia që në muajin Korrik, po për shkak të akuzave për armëmbajtje pa leje.
“Më ndihmoni të iki jashtë se policia po me përgjon, se sa pashë që po më afroheshin unë e hodha armën”, ka thënë në telefonatën e bërë me një nga anëtarët e bandës Bajraj, Stresi, bisedë e përgjuar nga prokuroria e Krimeve të Rënda.
Ashtu siç tha edhe avokati i tij Stresi ka qenë në kërkim prej Korrikut, me një vendim të dhënë nga Gjykata në mungesë.
Prindërit e Stresit e kanë konsideruar hakmarrje arrestimin e këngëtarit, pasi sipas tyre kjo vjen për shkak të padisë që Sali Lushaj bëri për shpifje ndaj Taulant Ballës.