Në Gjykatën e Apelit Tiranë ka nisur seanca ndaj Rexhep Rrajës, djalit të deputetit socialist Rrahman Rraja.
Përmes avokatit të tij, djali i deputetit ka paraqitur kërkesën në Apel për lirimin e tij nga paraburgimi. Vetë Rexhep Rraja ka zgjedhur të mos jetë i pranishëm në seancë dhe ka njoftuar përmes një letre mospjesmarrjen.
“Për arsye personale nuk dëshiroj të marr pjesë në seancë”.
Argumentat e avokatit, Ilir Murati, janë ato që nuk ka vepër penale për përndjekje apo dhunë ndaj Xhisiela Malokut, siç pretendon Prokuroria.
“Kërkoj shfuqizimin e vendimit të Gjykatës së Krujës dhe kërkoj lirimin e menjëhershëm.Kemi një histori rozë që nuk ka të bëjë me veprën penale të përndjekjes.Dëmtimet e shkaktuar te shtetasja Xhisela Maloku nuk përcaktojnë kohën kur është bërë” ka deklaruar avokati.
Avokati Murati ka përdorur si argument edhe deklaratat e fundit të vajzës.
“Xhisiela Maloku del përditë në televizione dhe thotë se nuk është përndjekur. Çështja është politizuar dhe ju jeni në presion”.
Por i menjëhershëm ka qenë reagimi i relatores së çështjes, gjyqtares Shpresa Beçaj, e cila është shprehur: “Nuk ju lejoj të thoni se jemi në presion, nuk kemi asnjë presion.Trupi gjykues është i pandikuar nga askush dhe do të shqyrtojë aktet e dosjes”.
Ndërkohë qëndrimi i organit të akuzës nuk ka ndryshuar, vazhdon të kërkojë masën “arrest me burg” ndaj Rexhep Rrajës.
Kërkesa e Rrajës për liri në Apel është dorëzuar që më 8 tetor, ndërsa hetimet për këtë dosje janë ende të hapura nga prokurorja Mirela Kapo.
Ai akuzohet për përndjekjen e ish-të dashurës së tij Xhisiela Maloku.
Por kjo e fundit nga ana tjetër ka deklaruar se me Rexhepin ka pasur vetëm marrëdhënie xhelozie dhe se ai nuk e ka keqtrajtuar.
