Deputeti i Partisë Socialiste, Fidel Ylli ka folur ditën e sotme për vendimin e Autoritetit të Komunikimeve Elektronike dhe Postare (AKEP), i cili publikoi ditën e djeshme një njoftim ku ishin listuar disa portale ‘online’.
Atyre u ishte lënë 72 orë kohë për të publikuar niptin në faqen e tyre ose të regjistrohen në Qendrën Kombëtare të Biznesit (QKB), përndryshe rrezikojnë të mbyllen.
Në një intervistë në In tv, deputeti u pyet edhe për televizionin online të kryeministrit Edi Rama, ERTV, të cilin e menaxhon përmes rrjetit social ‘Facebook’.
Pasi kërkoi që të gjobiten dhe të mbyllen mediat online që nuk janë të regjistruara, deputeti i PS nisi të marrë në mbrojtje median e kryeministrit, duke thënë se të gjithë mund ta bëjnë një gjë të tillë në rrjetet sociale.
Moderatori Flavio Qarri e pyet Yllin se ku është i deklaruar gazetari Alteo Hysi Hysi, i cili realizon intervistat në këtë medie, për të kuptuar sa e ligjshme është si medie.
Gazetari: Ku është i deklaruar gazetari, ku e merr rrogën gazetari i ERTV?
Ylli: Është vullnetar, çfarë problemi ka
Gazetari: Vullnetar 8 orë në ditë?
Ylli: Po, 8 orë, 6 orë. Në Facebook mund të dalësh edhe ti live, shkoni verifikoni dhe gjejeni personi kush është.
