Policia e Lushnjës jep detajet e para për ngjarjen e sotme, vrasjen në fshatin Shegas.
Sipas burimeve zyrtare të Policisë Vendore, mësohet se sonte, rreth orës 21:45, në fshatin Shegas, Lushnje, duke udhëtuar me mjetin e tij, rreth 100 m para se të mbërrinte te banesa, është qëlluar me armë zjarri shtetasi Qemal Alla, 48 vjeç, i cili ka gjetur vdekjen.
Sipas Policisë, viktima ishte fermer dhe nuk njihet si person me precedent kriminal.
Ekspertë të Hetimit të Krimit po hetojnë mbi shkakun dhe zbardhjen e rrethanave ende të paqarta.
Në ndihmë të grupit hetimor kanë shkuar një grup ekspertësh të Hetimit nga Drejtoria e Përgjithshme e Policisë së Shtetit.
Forca të shumta policie nga Komisariati i Lushnjes, Drejtoria Vendore e Policisë Fier dhe FNSH Fier në vendngjarje.
Pika kontrolli dhe krehje zone nga forcat e Policisë për kapjen e autorëve.
Grupi hetimor po punon për zbardhjen e plotë të ngjarjes dhe kapjen e autorit të saj.
