Darian Pavli është kandidatura e vetme e qeverisë shqiptare, që ka kaluar fazën e parë të përzgjedhjes për anëtarë të Gjykatës Europiane të të Drejtave të Njeriut në Strasburg. Pavli është vlerësuar nga Komisioni i Përzgjedhjes së kandidatëve në Gjykatën e Strasburgut.
Ai është vlerësuar si kandidati që përmbush më shumë kriteret për të qenë zëvendësuesi i gjyqtarit aktual, që ka Shqipëria në GJEND, Ledi Bianku. Më datë 28 shtator, Komisioni i Përzgjedhjes së kandidaturave ka zhvilluar intervistimin e tre kandidatëve që dërgoi qeveria Rama. Në listën e kandidatëve, veç Darian Pavlit, ishte ish-gjyqtari i Gjykatës Kushtetuese, Sokol Berberi dhe pedagogia, Marjana Semini.
Emri i Darian Pavlit është përfshirë në axhendën e Asamblesë së Përgjithshme të Këshillit të Europës për t’u votuar në datën 12 tetor të këtij viti. “Komisioni intervistoi të gjithë kandidatët, më 28 shtator 2018. Komisioni i rekomandon Asamblesë Parlamentare, me shumicë të madhe, z. Darian Pavli si kandidatin më të kualifikuar”, thuhet në materialin zyrtar.
Burime nga Gjykata e të Drejtave të Njeriut bën të ditur se komisioni i drejtuar nga Presidenti Valeriu Ghiletchi nga Republika e Moldavisë përbëhet nga anëtarë të forcave të majta politike. Ndërkohë që votimi i datës 12 tetor do të kërkojë konsensus të gjerë për kandidaturën e Shqipërisë. Në rast se emri i Darian Pavlit nuk votohet me konsensus nga të majtët dhe të djathtët, atëherë procedura mund të rinisë nga e para.
KANDIDATI
Po kush është Darian Pavli? Ai vjen nga radhët e juristëve me një eksperiencë prej 15 vitesh. Ka ushtruar rolin e ekspertit pranë organizatës ndërkombëtare SOROS. Pavli ka marrë pjesë dhe në sekretariatet e Reformës në Drejtësi dhe ka pasur rolin e ekspertit ligjor pranë misionit EURALIUS V. “Z. Darian Pavli – jurist me 15 vjet përvojë në dizenjimin, koordinimin dhe zbatimin e aktiviteteve që promovojnë mbrojtjen e të drejtave të njeriut në Nju-Jork, Tiranë (Open Society Justice Initiative, Human Rights Watch), përfshirë rajonin e Këshillit të Europës, ekspert ligjor pranë EURALIUS V, këshilltar i Komisionit të Posaçëm Parlamentar i Reformës në Drejtësi, përfaqësim të disa çështjeve në GJEDNJ”, thuhet në CV-në e shpërndarë nga Qeveria për kandidatin Darian Pavli.
RIVALËT
Dy kandidatët e tjerë që ka dërguar qeveria për rolin e gjyqtarit të GJEND, ishin emrat e Sokol Berberit dhe Marjana Seminit. Emri i Berberit është dërguar katër herë si kandidaturë, por ajo nuk është pranuar.
Në CV-në e dërguar nga qeveria thuhet se: “Z. Sokol Berberi – jurist me përvojë të spikatur në fushën e së drejtës, anëtar i Gjykatës Kushtetuese (prill 2007 – shtator 2016), mbajtës i titullit “Doktor”, profesor në disa disiplina të së drejtës, kontribuues në përafrimin e legjislacionit shqiptar me Konventën Europiane të të Drejtave të Njeriut etj”.
Ndërsa kandidatja tjetër Semini mban titullin “profesor i asociuar”. “Znj. Marjana Semini – juriste me përvojë të spikatur në fushën e së drejtës; mbajtëse e titullit “Profesor i asociuar”, profesore e brendshme në Shkollën e Magjistraturës për 20 vjet dhe drejtore e saj (2009-2013), eksperte e lartë e Komisionit të Reformës Ligjore, si dhe e organizatave të huaja (USAID, BB, UNESCO, BERZH etj.), specializime për të drejtat e njeriut, autore dhe bashkautore e disa botimeve”, thuhet në njoftimin e qeverisë për kandidaten.
