Drejtoria e Antimafias së Puljas në Itali ka sekuestruar pjesën më të madhe të pasurisë së Mario Ciancio Sanfilippo, drejtues i grupit mediatik “La Gazzeta del Mezzogiorno”, për shkak të dyshimeve për lidhje me organizata mafioze.
Grupi mediatik ka pasur një përfaqësuesin e saj edhe në Shqipëri, Carlo Bollino, i cili aktualisht drejton “Report tv” dhe “shqiptarja.com”. Bollino, për shumë vite, nga viti 1993, ka qenë përfaqësues zyrtar i “La Gazzeta dell Mezzogiorno”, në kohën kur drejtonte të përditshmen “Gazeta Shqiptare”.
Gjithashtu, deri në vitin 2014, Bollino ka qenë drejtor i “Gazzetta Dell Mezzogiorno”, pra një prej bashkëpunëtorëve më të afërt të Mario Ciancio Sanfilippo, i cili drejton grupin mediatik italian që prej vitit 1976.
Disa vitë më parë, Bollino, për llogari të “La Gazzeta del Mezzogiorno”, ia shiti “Gazeta Shqiptare” një biznesmeni shqiptar. Pas këtij transaksioni, Carlo Bollino, me të ardhurat e tij krijon grupin mediatik “Shqiptarja.com”, ku përfshihet edhe “Report tv”.
Media italiane i ka dhënë një hapësirë të konsiderueshme lajmit mbi sekuestrimin e pronave të Mario Ciancio Sanfilippo, duke i mëshuar faktit se Antimafia Italiane e akuzon për lidhjet me organizata mafioze.
“La Gazzetta del Mezzogiorno”, e përditshmja më e rëndësishme e Puljas në Itali, shumë shpejt do të drejtohet nga një administrator financiar shtetëror.
Gjykata e Katanias ka lëshuar një urdhër sekuestrimi dhe konfiskimi, në bazë të një kërkese të Drejtorisë Rajonale të Antimafias për një pjesë të konsiderueshme të pasurive të botuesit dhe njëkohësisht drejtorit editorial Mario Ciancio Sanfilippo. Aktualisht, për sipërmarrësin siçilian është duke u zhvilluar një proces për lidhje me grupe mafioze.
Pasuritë e sekuestruara, sipas një vlere të përafërt, arrijnë në shifrën e 150 milionë eurove. Vendimi i gjykatës për sekuestrimin e pasurive të Ciancio është ekzekutuar nga Karabinierët e Repartit Ros të Komandës së Katanias.
Vendimi i gjykatës urdhëron bllokimin e llogarive bankare, policave të sigurimit, 31 shoqërië dhe pjesë në kapital të disa kompanive imobiliare, ku rezulton pronar ose aksioner Mario Ciancio Sanfilippo.
Në mënyrë specifike, janë sekuestruar e më tej janë në proces konfiskimi, pasuritë e të gjithë grupit editorial, në të cilin Ciancio është drejtues. Ndër të tjera, përmenden sekuestrimi i gazetës “La Sicilia”, pjesa më e madhe e kuotave të “Gazetta del Mezzogiorno” të Barit dhe dy stacione televizive rajonale, “Antena Sicilia” dhe “Telecolor”
Ndërkohë, gjykata ka caktuar edhe administratorët publikë, të cilët kanë për detyrë garantimin e vijimit të aktivitetit të grupit mediatik dhe të punës së qindra gazetarëve e teknikëve.
Pas këtij vendimi ka reaguar edhe vetë pronari i Ciancio, i cili, për mediat italiane, ka deklaruar: “Në kuadër të këtij hetimi, unë, nëpërmjet avokatëve të mi, kam dëshmuar se nuk kam asnjë lloj raporti me mafiozët dhe se pasuria ime është rezultat vetëm i punës sime dhe paraardhësve të mi në krye të grupit mediatik. Unë mendoj që argumentat e gjykatës janë të dobët”.
