Ervis Martinaj, personi që ishte në qendër të atentatit me një të vdekur dhe dy të plagosur në qendër të Tiranës mbrëmjen e së Enjtes, i ka ofruar “pazar” Ylvi Beqjas, dëshmitarit kryesor kundër Emiljano Shullazit, për të tërhequr dëshminë e tij.
Emiljano Shullazi, një prej emrave më të përfolur të botës së “nëndheshme” shqiptare, u arrestua në Prill 2016, si i dyshuar për disa vepra të rënda penale. Një ndër akuzat ndaj Shullazit dhe miqve të tij ishte kërcënimi dhe marrja me dhunë e nën kërcënimin e armëve të disa pasurive të shtetasit Ylvi Beqja, ku përfshihen 30% e pronësisë së ish-hotel “Vollga” në Durrës, si edhe shuma parash, në vlerë rreth 500 mijë euro.
Ylvi Beqja dha dëshminë e tij para prokurorëve të Krimeve të Rënda për këto raste, duke bërë të mundur që Emiljano Shullazi të qëndronte pas hekurave. Gjatë fazës së hetimit ndaj Shullazit, pavarësisht se Ylbi Beqja ishte nën mbrojtje shtetërore, ai kontaktohet nga Ervis Martinaj.
Ky i fundit, gjatë një bisede me Ylvi Beqjan, i ka propozuar këtij të fundit një “pakt” në vlerë 7 milionë euro, në këmbim të tërheqjes nga kallëzimi që kishte bërë ndaj Emiljano Shullazit.
Sipas bisedës, së pranuar nga vetë Beqja në dëshminë e tij para Gjykatës për Krime të Rënda, Ervis Martinaj i kishte propozuar që t’i jepte 1 milion euro paradhënie dhe 6 milionë të tjera, pasi ai të tërhiqte dëshminë e dhënë kundër Emiljano Shullazit.
Ylvi Beqja e ka refuzuar këtë pakt dhe nuk ka pranuar paratë që do të merrte nga Ervis Martinaj, për llogari të Shullazit. Në dëshminë e tij, dhënë në një seancë me dyer të mbyllura në Gjykatën për Krime të Rënda, burimet thonë se Ylvi Beqja ka deklaruar se Ervis Martinaj i ka përmendur gjatë bisedës edhe emra me pushtet të lartë politik dhe vendimmarrës.
Gjithësesi, “pakti” nuk u arrit dhe Ylvi Beqja nuk u tërhoq nga dëshmia e tij kundër Emiljano Shullazit. Tashmë procesi ndaj Shullazit dhe grupit të tij ka arritur në fazën përfundimtare. Pak ditë më parë, Prokuroria për Krime të Rënda kërkoi në total një dënim prej 64 vitesh për 5 anëtarët e grupit, nga të cilat 17 vetëm për kreun e grupit, Emiljano Shullazi.
Pavarësisht përfshirjes së Ervis Martinajt në mënyrë indirekte në këtë çështje, nuk është raportuar publikisht për nisjen e ndonjë hetimi ndaj tij për ndërhyrjen tek dëshmitari i drejtësisë, Ylvi Beqja.
