Ai është 60-vjeçari Flamur Veliu, banues në qytetin e Lushnjës. Burime nga Policia e Fierit bënë të ditur se Veliu është përfshirë në një aksident rrugor, ku si pasojë e humbjes së kontrollit të mjetit ka përplasur tri makina të tjera.
Aksidenti ka ndodhur në vendin e quajtur “Mulliri i artë”, i cili ndodhet në segmentin rrugor FierLushnjë, rreth 3 kilometra në dalje të qytetit të Fierit. Nga ana tjetër, Policia e Fierit deklaron se shkak i aksidentit mund të jetë bërë gjendja e shefit të Komisariatit Patos. Ky i fundit ka qenë i dehur në momentin kur ka humbur kontrollin.
Arrestimi i tij është bërë nga oficerët e Shërbimit për Çështjet e Brendshme dhe Ankesave në Drejtorinë Vendore të Policisë së Fierit. “Arrestimi i këtij shtetasi u bë pasi në aksin rrugor FierLushnjë, në vendin e quajtur “Mulliri i artë” Fier, është përfshirë në një aksident automobilistik me dëme materiale dhe pas verifikimit me aparat, alkool-testi ka rezultuar se drejtonte mjetin “Fiat Stilo” në gjendje të dehur”, bëri të ditur Policia.
Ndërkohë, pas ngjarjes mësohet se ka qenë vetë shefi i Komisariatit, Veliu, ai që ka njoftuar kolegët duke u treguar se ka përplasur tri makina të tjera në rrugë. Ai iu ka kërkuar atyre që të shkojnë në vendngjarje dhe të kryejnë veprimet, teksa i ka pritur edhe vetë në vend. Edhe pse nuk ka pasur dëme në njerëz, por vetëm dëme materiale, shefi i Policisë ka kërkuar ndihmën e kolegëve. Këta të fundit, pas testit të alkoolit e kanë shoqëruar për në komisariat.
“Materialet hetimore lidhur me këtë ngjarje ndaj shtetasit Flamur Veliu do t’i referohen Prokurorisë pranë Gjykatës së Shkallës së Parë Fier, për veprën penale ‘Drejtimi i automjetit në mënyrë të parregullt’”, thuhej në njoftimin e Policisë. Flamur Veliu kishte rreth dy vite në këtë detyrë dhe është njohur për marrëdhënie korrekte në punë. Disa burime tregojnë se pas pune, ditën e djeshme ai ka qëndruar me miq në qytetin e Fierit ku edhe kanë pirë.
Ndërkohë, vetë Veliu ka thënë për kolegët se nuk kishte pirë aq sa të mos kontrollonte mjetin. Aksidenti sipas tij ka ndodhur për shkak të fluksit të mjeteve në atë rrugë dhe parakalimeve të shpejta, çka ka krijuar kaos në trafik në çastin e përplasjes. Por pavarësisht justifikimit të tij te kolegët në Fier, këta të fundit me ndërhyrjen e SHÇKB-së i kanë komunikuar ndalimin. Burime nga grupi i hetimit bënë të ditur se në këtë ngjarje nuk pati asnjë shtetas të plagosur, veç dëme materiale në automjetet që u përfshinë në aksident.
