Është derbi i fillestarëve! Me ngadalë. E dimë që do të na përmendni derbet që ka luajtur Gega si futbollist. E dimë që dikush mund të thotë se Ze Maria s’e ka të parin, pasi ka luajtur disa, ndoshta më të rëndësishëm, në Europë. E dimë që mund të na përmendni Karabecin apo edhe Alban Hoxhën, që ka humbur vetëm një qëkur ka ardhur te Partizani.
Çështja është se ky është një derbi fillestarësh për të dy trajnerët, që nuk e kanë përjetuar këtë përballje të ulur në pankinë. Jo vetëm kaq, por për 34 lojtarë (16 nga Tirana dhe 18 nga Partizani) është hera e parë që do të jenë në një sfidë të tillë. Disa mund ta kenë përjetuar me moshat e të tjerë kurrë, edhe pse kanë emër dhe e njohin futbollin shqiptar, si Telushi apo Hasani, por nuk e kanë luajtur për asnjë sekondë derbin kryeqytetas.
Në rastin më të mirë, e kanë ndjekur për të parë rivalët apo për të shijuar festën që prodhon ky takim. Por a do të jetë ky një derbi ndryshe? A do të jetë më interesant dhe spektakolar, apo spektakli do të jetë vetëm ai i tribunave me banderola, thumbime e ngacmime që prekin historinë e secilit klub dhe fusha do të jetë një shfaqje frike. Sinjalet janë dhënë se nuk e njohin këtë të fundit. Partizani, sepse e dominon këtë përballje ku nuk e njeh humbjen në 13 sfidat e fundit me rivalët, ndërsa Ze Maria, gjithashtu, ka dhënë një sinjal të fortë.
Aq sa është i gatshëm të lërë edhe kapitenin në stol apo të pranojë pa fund kritika për mbrojtjen që e rreshton shumë përpara dhe lë hapësira në prapavijë, duke prishur ekuilibra të rëndësishëm, por gjithsesi luan në sulm. Për vijim, mund të rezultojë që përveçse derbi fillestarësh, të jetë edhe spektakolar siç edhe do ta donin të gjithë. Krahas historisë dhe kënaqësisë apo trishtimit që prodhon kjo përballje për të dyja kampet, në funksion të garës së përgjithshme në kampionat, mund të jetë një impuls i rëndësishëm për vijimësinë.
Një fitore sot, në javën e gjashtë, e bën secilën skuadër që të katapultohet në ndjekje të kreut të klasifikimit me moral super të lartë dhe me vetëbesimin se ka mjaftueshëm forcë për t’u përballur me gjithkënd. Në të kundërt, vala e trishtimit në derbi lëkund jo pak dhe ndikon mbi të gjitha në humorin që rrethon ekipin.
