Kur na ndajnë më pak se 24 orë nga derbi i kryeqytetit mes Tiranës dhe Partizanit, FSHF ka caktuar edhe emrin e gjyqtarit që do të mbajë drejtësinë në takimin më të rëndësishëm të kësaj jave në Kategorinë Superiore.
Pas eksperimenteve të javëve të fundit me emra të rinj, FSHF nuk ka guxuar të eksperimentojë me këtë sfidë dhe ka caktuar një ndërkombëtar për të drejtuar takimin që mungonte prej një viti e gjysmë.
Gjyqtari i caktuar për ndeshjen e nesërme është ndërkombëtari Enea Jorgji, një emër të cilin në FSHF e cilësoi si më të përshtatshmin për të drejtuar duelin më të rëndësishëm e një më të tensionuarit në futbollin tonë. Asistentë të tij janë caktuar gjithashtu emra të njohur pasi vijërojtës do të jenë Ermal Barushi dhe Rejdi Avdo.
Për Jorgjin kjo nuk është hera e parë që drejton një derbi të kryeqytetit. Ai ka drejtuar edhe më parë një ndeshje të tillë në karrierën e tij, për herë te fundit në shtator 2016 kur sfida e luajtur në “Elbasan Arena” u mbyll në barazim pa gola.
