Një organizatë ndërkombëtare filantropike, e themeluar nga miliarderi George Soros, tha të hënën, se ka paraqitur kërkesën në Gjykatën Evropiane për të Drejtat e Njeriut dhe në Gjykatën Kushtetuese të Hungarisë për të sfiduar ligjet e fundit të qeverisë hungareze, duke synuar grupet qytetare që punojnë me refugjatët dhe azilkërkuesit.
James Goldston, drejtor i ekipit ligjor të Fondacioneve të Shoqërisë së Hapur, tha për “The Associated Press” se veprimi ligjor ka për qëllim kundërshtimin e ligjeve “të cilët janë miratuar për të heshtur dhe trembur zërat e pavarur në Hungari”.
Fondacionet e Shoqërisë së Hapur, mbështesin disa nga grupet të cilat janë shënjestruar nga politikat anti-emigracion të kryeministrit Viktor Orban.
Hungaria miratoi në qershor legjislacionin e quajtur “Stop Soros”, që kërcënon të burgosë deri në një vit, të gjitha ata që ndihmojnë azilkërkuesit.
Në korrik ligjvënësit hungarezë miratuan 25 për qind taksë për ata që ofrojnë mbështetjen financiare ose materiale për grupet që promovojnë migracionin.
“Ligji i taksave përfshin aq shumë “shënjestra”, saqë qeveria hungareze mund të synojë pothuajse të gjitha fondet për grupet e të drejtave të njeriut dhe shoqërinë civile edhe nëse një pjesë e vogël e fondeve shkon për migrimin”, tha Goldston nga Nju Jorku në një intervistë telefonike.
Ai tha se shpresonte që Gjykata Ndërkombëtare e të Drejtave të Njeriut do të merrej shpejt me çështjen, për shkak të situatës “kritike” në Hungari.
“Qeveria ka dëmtuar pavarësinë e gjyqësorit, ka zbutur mediat dhe tani kërkon të heshtë grupet e shoqërisë civile, të cilat janë ndër zërat e fundit kritikë publikë të mbetur në Hungari”, tha organizata në një deklaratë.
Komiteti hungarez i Helsinkit, i cili siguron ndihmë juridike për azil-kërkuesit mes aktiviteteve të tjera, tha javën e kaluar se po paraqiste kërkesa të ngjashme në gjykatat hungareze dhe evropiane.
Ai tha se kërcënimi me burg që vjen nga ligji “Stop Soros” ishte një rrezik jo vetëm për bashkëpunëtorët e tij, por “çdo qytetar me mirëkuptim që i sheh refugjatët si njerëz dhe i ndihmon ata”.
Universiteti i Evropës Qendrore me bazë në Budapest, i themeluar gjithashtu nga Soros, tha muajin e kaluar se po pezullonte programet e arsimit për refugjatët dhe azilkërkuesit për shkak të paqartësive rreth ligjit të taksave.
Një nga arsyet e padive që po bëhen në Gjykatën Ndërkombëtare të të Drejtave të Njeriut është se një amendament kushtetues i miratuar nga partia e Orbanit, “Fidesz” në masë të madhe e kufizon aftësinë e Gjykatës Kushtetuese për të shqyrtuar rastet mbi taksat ose që ndikojnë në buxhetin e shtetit.