Shumë raste të krijuara por vetëm një gol i shënuar. Duhej një mbrojtës si Shameti për të nxjerrë nga situata Kukësin dhe trajnerin Armando Cungum, që pas ndeshjes deklaroi se suksesi ishte i merituar.
Fitore e merituar: Jam i kënaqur për pikët dhe në përgjithësi për lojën. E merituam fitoren. Si në pjesën e parë edhe për 25 minuta në pjesën e dytë dominuam. Nga minuta e 70-të, pasi Shafik nuk ka gjendjen më të mirë fizike. Edhe unë isha në dilemë për ta ndërruar, pasi do na binte mbajtja e topit, pasi në ato momente duhet qarkulluar topi. Edhe ndërrimi i tij ndikoi, pasi Kamza na vuri në vështirësi, me forcat e shumta sulmuese. Në këto kushte, është instiktive tërheqja e ekipit për të mbrojtur rezultatin.
Raginaldo dhe Shameti: Reginaldo e bëri mirë detyrën e tij, meriton komplimenta për shpirtin e garës. Patëm raste për të shënuar në pjesën e parë, edhe në të dytën, nuk na falet t’i humbim gjithë ato raste. Gjithsesi, rëndësi kanë pikët. Kur je në avantazh, je duke marrë 3 pikë, është e vështirë të pësosh në fund, për një pakujdesi. Për këtë arsye, ngul këmbë që të shënojmë rastet që krijojmë. Na mungon finalizimi. Patëm disa situata sot, por mesfushorët e sulmuesit nuk shënuan. Duhej një mbrojtës si Shameti të vinte e të zgjidhte situatën.
Plani B për golin: E rëndësishme është që ekipi shkon te porta. Mungon ndoshta edhe qetësia. Nuk kanë të gjithë nuhatjen e Reginaldos, por nuk mund të varet një ekip vetëm nga ai. Edhe Çyrbja ka luajtur sistematikisht, dhe do presim edhe kontributin e tij në fushë.
Derbi i kryeqytetit: Është herët për të bërë llogari. Për mua, është e rëndësishme, por edhe për tifozët, të shohin një ndeshje të bukur. Edhe tifozëritë të jenë shembullore, pa incidente.