Tre persona me maska kanë hyrë në një banesë gjatë natës dhe kanë vjedhur me dhunë. Ngjarja është shënuar në Bulqizë dhe policia ka shoqëruar 8 persona si dhe ka shpallur në kërkim një nga autorët e dyshuar.
Autorët kanë pritur momentin kur çifti ka hyrë në banesë dhe kanë parkuar makinën.
“Shtetasi A.M, 50 vjeç, sëbashku me bashkëshorten B.M, 37 vjeçe, në momentin që kanë hyrë në banesën e tyre duke parkuar automjetin tip benz, tre persona të maskuar ku dyshohet se posedonin dhe armë zjarri, i kanë futur në banesë, kanë kontrolluar për sende me vlerë, dhe më pas janë larguar duke marrë automjetin tip benz në pronësi të shtetasit A.M.” informoi sot policia e Dibrës.
Mbi bazën e informacioneve të marra në rrugë operative shërbimet e Policisë kanë shoqëruar si të dyshuar për ngjarjen 8 shtetas, si dhe është shpallur në kërkim një shtetas tjetër, si një ndër autorët e dyshuar të kësaj ngjarje ku për arsye hetimi nuk bëjmë me dije të dhëna të tjera.
Po në vijim të punës për zbardhjen e kësaj ngjarje shërbimet e policisë kanë bërë të mundur gjetjen e automjetit, të braktisur.
Vijojnë hetimet për zbardhjen dhe dokumentimin e plotë të ngjarjes.