Sherri i bujshëm që ndodhi më 13 shtator të vitit 2016 në një prej hoteleve më të njohura në Kosovë midis dy grupeve rivale të Hip-Hop, “OTR” dhe “Babastars”, është zhvendosur në gjykatë.
Lideri i “OTR” Noizy dhe reperi nga Kosova Cozman të shoqëruar nga anëtarët e tjerë të grupeve përkatëse u përfshinë në një sherr masiv.
Përleshja e dhunshme fizike ku pati edhe përdorimin e armëve të zjarrit, përfundoi duke u gjykuar nga ligji dhe është mbajtur seanca fillestare.
Dosja e Prokurorisë është zbardhur me detaje.
NGJARJA
Në këtë proces gjyqësor i akuzuar është Rigels Rajku (Noizy), ndërsa reperi tjetër, Ylber Abdullahu (Cozman), është palë e dëmtuar.
Si pasojë e kësaj përleshje mbetën të lënduar disa persona, përfshirë edhe Rigels Rajku, i njohur për publikun si “Noizy”, atij i është hequr një plumb në kofshë gjatë një ndërhyrjeje kirurgjikale.
Ndërsa Visar Shala, i njohur në tregun e muzikës me nofkën ‘Skivi’, është vetëm dëshmitar në këtë proces gjyqësor.
Sipas aktakuzës, ‘Noizy’, në ditën kritike i ishte vërsulur fizikisht Albert Krasniqit dhe Ylber Abdullahut, pasi i akuzuari Krasniqi dhe tani i dëmtuari Abdullahu me automjet të të dëmtuarit kanë ardhur në parking.
Aktakuza thotë se ‘Noizy’ fillimisht i është vërsulur ‘Cozman’-it, të cilit i është afruar ndërsa ishte duke ndenjur në automjetin e markës “Range Rover” dhe me grusht e ka goditur në pjesën e tëmthit dhe e ka shtyrë në automjet, me ç‘rast është shkaktuar rrahja e përgjithshme dhe i dëmtuari kishte pësuar edhe ca goditje.
Më pas, gjithnjë sipas aktakuzës, ‘Noizy’ kishte kaluar nga ana tjetër e automjetit nga vendi i pasagjerit dhe e kishte goditur me grusht në anën e djathtë të fytyrës në regjionin e buzëve tani të dëmtuarin Abdullahu.
Si rrjedhojë, prokuroria pretendon se i dëmtuari Abdullahu ka pësuar lëndime të lehta trupore, si dhe i akuzuari i dytë Albert Krasniqi, me pasoja të përkohshme për shëndetin për të dy personat.
Atë ditë, reperi “Noizy” kishte hyrë në operim në të cilin mjekët i kishin larguar një plumb gjatë ndërhyrjes kirurgjike.
Aktakuza sqaron prejardhjen e plumbit në trupin e tij nga i akuzuari tjetër i rastit, Albert Krasniqi, pasi që ky i fundit kishte shtënë dy fishekë “njëri nga të cilët ka përfunduar në trupin e Rajkut”.
Sipas aktakuzës, deri te kjo ka ardhur pasi i akuzuari Albert Krasniqi kishte qenë në veturë me të dëmtuarin ‘Cozman’ dhe pasi ka ardhur në parking, edhe ai është sulmuar nga ‘Noizy’, dhe në një moment ka nxjerrë nga xhepi i xhaketës pistoletën në fjalë.
Me këtë, Krasniqi, ngarkohet nga prokuroria me veprën penale lëndim i lehtë trupor, si dhe mbajtje në pronësi, kontroll ose posedim të paautorizuar të armëve.
Përveç këtyre dy veprave penale, ai ngarkohet edhe për një vepër tjetër penale të lëndimit të lehtë trupor ndaj Denis Hajrit, i dëmtuar në këtë incident.
“Ka shtënë dy fishekë në drejtim të tokës nga të cilët njëri fishek e ka plagosur tani të dëmtuarin Denis Hajri, i cili ka pësuar lëndime të rënda trupore të shkaktuara me veprim dinamik të armës së zjarrit”, thuhet më tej në aktakuzë.
Të akuzuar në këtë proces përveç reperit “Noizy” dhe Albert Krasniqit, është dhe Elvis Hyseni.
Hyseni, sipas aktakuzës, në datën, kohën dhe vendin për të cilin bëhet fjalë, në momentin kur ka ardhur policia në vendin e ngjarjes, kur i akuzuari Albert Krasniqi me kërkesë të policisë ishte duke e lëshuar armën poshtë (në tokë) “me dashje ka përdorur dhunë dhe ka sulmuar fizikisht”, Krasniqin duke e goditur me grusht në pjesën e fytyrës.
