Selfie-mania shkakton një tjetër viktimë. Një djalë 15-vjeçar ka gjetur vdekjen, pasi ka rënë poshtë një kanali ajrimi në qendrën tregtare Sarca, në Milano.
Adoleshenti italian ishte ngjitur me një grup miqsh në çatinë e strukturës për të bërë një selfie dhe kur është zbuluar nga forcat e sigurisë është përpjekur të largohet, por ka rënë në tubin e ventilimit duke fluturuar nga 25 metra lartësi.
“Donim të bënim një selfie për të treguar që ishim ngjitur në majë të kinemasë Skyline’, kanë treguar miqtë e tij.
Ngjarja ka ndodhur rreth orës 22:20 të së shtunës. Në momentin që djali nga Cusano Milanino po përpiqej të largohej ka rënë në një hapësirë shumë të ngushtë dhe forcave të zjarrfikëseve u është dashur një manovër shumë e komplikuar për ta nxjerrë që atje.
15-vjeçari u transportua në spital por si pasojë e plagëve të marrë nuk mundi të mbijetojë duke ndërruar jetë mëngjesin e sotëm.
