Skuadra e Interit më në fund mori fitoren e parë në kampionat, por duket se te zikaltërit nuk ka vend për qetësi. Arsyeja këtë herë janë dy ‘yjet’ e ekipit, kapiteni Mauro Icardi dhe qendërmbrojtësi Milan Skrianiar.
Për ‘bomberin’ është folur gjithmonë se rinovimi do të ndodhte pas korrikut, por pas kaq kohësh duket se marrëveshja është akoma larg. Aktualisht kapiteni zikaltër përfiton 5 mln euro dhe pretendon që në kontratën e re të negociohet për jo më pak se 8 mln.
Problemi nuk është vetëm Icardi. Lideri i mbrojtës, Skriniar, ndonëse ka një kontratë deri në vitin 2022 më herët ka refuzuar rinovimin e saj. 23-vjeçari aktualisht përfiton 1.5 mln euro dhe nga Interi më herët i është ofruar 2.5 në sezon, por ai ka pretenduar për më shumë.
Në fakt në rastin e sllovakut diferenca është e vogël dhe marrëveshja mund të arrihet, por ajo që bën përshtypje është vështirësia e ziklatërve, apo refuzimi i lojtarëve për të rinovuar.
Në dijeni të kësaj situate është vënë Manchester United, klubi që sipas mediave britanike po përgatit ofertën për t’i transferuar në “Old Trafford”. Në këtë mënyrë do të heshte edhe Mourinho, i cili nuk ka humbur rast për të kritikuar merkaton e klubit të tij.
