Nga Boldnews.al
Në momentin e parë sapo nisën negociatat mes Shqipërisë dhe Greqisë, Rama premtoi se qeveria shqiptare, si askush tjetër nga paraardhësit, ka hyrë si e barabartë në diskutimet dypalëshe. Kryeministri argumentoi se ndër të tjera do të diskutohej për ndarjen e detit e madje edhe për çështjen çame.
Për ta përforëcuar edhe më shumë idenë se ishin superiorë, (ose të paktën të barabartë), herë pas herë nxirrte ministrin Bushati, për të komunikuar se të gjitha çështjet ishin shtruar në tavolinë, përfshi edhe atë çame. Sa herë përmendej ndarja e detit, pala jonë këmbëngulte se do të përfitonte edhe më shumë se marrëveshja e mëparshme e vitit 2009. Ndërsa nuk mungonin deklaratat se ekspertët po merreshin në thelb edhe me genocidin mbi popullsinë çame dhe të drejtën e pronave të tyre.
Propagandë kudo e në çdo kohë. Nga ana tjetër, pala greke la pas deklaratat dhe vijoi të diskutonte çështjet në interes të saj. “Përpiqen të fusin nga “dritarja” çështjen çame. Nuk ekziston kjo çështje. Dhe do të thosha se është për të mirën tonë, që në këto tema të ketë më shumë mendjekthjelltësi pas në çështje serioze kombëtare duhet të ketë informim, dakordësi dhe besim”, tha Tsipras. Mjaft i qartë dhe me ide të kristalta se as që bëhej fjalë që çështja çame të ishte në diskutim.
Gjithashtu po bëjnë përpjekje për të përfituar zonë detare pikërisht në vendburimet e gazit dhe naftës, ndërsa Shqipëria mund të marrë më shumë hapësirë detare se marrëveshja e vitit 2009, por ujë e kripë dhe jo gaz dhe naftë… Nëse do të merren në analizë marrëveshjet e deritanishme tashmë të arritura, pala greke ka marrë çfarë dëshiroi.
Arritën që të përfitonin menjëherë dy memoriale për ushtarët grek të rënë gjatë Luftës së Dytë Botërore, ndërsa u kryen zhvarr8ime të shumta në Bularat të Tepelenës. Gjithashtu, Athina zyrtare siguroi elementë shtesë për minoritetin grek në Shqipëri, që po trajtohen nga ana jonë me privilegje të shumta si asnjë monoritet tjetër në vend.
Deri më tani qeveria mburret me faktin se në “këmbim” ka përfituar njohjen e patentave shqiptare në Greqi, apo premtimi për zgjidhjen e toponimeve. Përfundimi do të jetë i qartë ku pala greke në lidhje me marrëveshjen e detit do të arrijë të vendosë diktatin e saj, pasi nuk merret me deklarata boshe e pompoze në fillim dhe më pas e nënshtruar. Rama e tregoi se në fillim u krekos si “gjel” që do mërrte më shumë det, apo do zgjidhte çështjen çame, por faktet treguan se çdo marrëveshje do jetë në disfavorin e shtetit Shqiptar, duke i rënë të gjitha premtimet për marrëveshje të drejta me fqinjët jugor.
