Nga Boldnews.al
Më 18 korrik Ministrja e Shëndetësisë shpalli 114 vende të lira pune për infemierët në të gjitha spitalet dhe qendrat shëndetësore të vendit. Mijëra infemierë të papunë aplikuan në portalin “Infermier për Shqipërinë” , me shpresën se do të përzgjidheshin për të gjetur një vend pune brenda vendit, ndërsa qindra të tjerë po largoheshin drejt vendeve europiane për punë. Me shpalljen e konkursit, ministrja Ogerta Manastirliu deklaroi se mes fituesve do të përzgjidheshin më të përgatiturit, duke i dhënë kështu fund sagës disa vjeçare për të gjetur punë me mik. “Kush është më i përgatituri e fiton me zotësi vendin e punës. Për çdo vend të ri pune që hapet në spitalet dhe qendrat shëndetësore publike në vend, kush ka më shumë pikë, zgjedh i pari”, shkruante mes entuziazmit të portalit ministrja e Shëndetësisë, Ogerta Manastirliu.
Sot pas dy muajsh, gjithë konkursi dhe portali rezultuan një farsë. Ndërsa fituesit e konkursit janë shpallur dhe presin emërimin, ministrja Ogerta Manastirliu ka bllokuar gjithçka duke i lënë ata në harresë. Prej 2 muajsh, infermierët e shpallur fitues vijojnë të ngelen pa punë pasi emërimet janë bllokuar pa asnjë shkak apo urdhër nga vetë ministrja që u premtoi punë me meritë. Edhe pse kandidatët janë interesuar vazhdimisht në Ministrinë e Shëndetësisë për këtë situatë ata nuk kanë marrë asnjë përgjigje nga ky institucion. Nga ana tjetër, bllokimi i emërimeve për infermierët e shpallur fitues për 114 vende vakante në spitale dhe qendra shëndetësore ka krijuar probleme me mungesën e personelit në këto institucione, duke cënuar kështu edhe shërbimin që ofrohet për pacientët.
Aktualisht në Shqipëri janë rreth 16 mijë infermierë të licencuar, prej të cilëve 13 mijë janë të punësuar dhe rreth 3 mijë infermierë janë në kërkim të një vendi pune. Ndërkohë, çdo vit rreth 1400 infermierë mbarojnë studimet në universitetet publike të vendit dhe rreth 800 infermierë licensohen çdo vit duke u shndërruar menjëherë në punëkërkues potencialë. Për këtë situatë, ministrja Manastirliu është shprehur se ka dijeni të plotë, duke pohuar se 2500 infermierë dhe profesionistë të shkencave teknike mjekësore trokasin gati çdo ditë në dyert e qendrave shëndetësore apo spitaleve për një vend pune. Muaj më parë ajo premtoi se tashmë dyert e tyre nuk do të hapen më me mik apo ndërhyrje të tjera, por vetëm me meritokraci. Por, sot kjo ministre që premtoi punësim për mijëra të diplomuar në shkencat mjekësore teknike, duke u dhënë shpresë që të mos largohen nga vendi, është po ajo që ua ka mbyllur të gjitha mundësitë për një vend pune.
