Partia Demokratike, LSI dhe aleatët e tjerë të opozitës nuk morën pjesë në seancën e parë plenare për këtë sesion të ri parlamentar. Kryetari Lulzim Basha si edhe aleatët e tyre, LSI e partitë e tjera të vogla në orën 17:00 në të njëjtin orar që po zhvillohet seanca plenare në Tiranë po mbajnë një takim në Shkodër, të cilësuar si të jashtëzakonshëm pas ngjarjeve të fundit kriminale. Në takimin janë të pranishëm edhe kryetarja e LSI, Kryemadhi, Sali Berisha dhe kryetarja e bashkise se Shkodres, Ademi.
Fjala e Bashës
Jemi këtu për dy arsye, për të dhënë një mesazh të prerë në mbështetje të Shkodrës për një qëndresë të prerë kundër bandave dhe krimit, që po marrin peng të sotmen dhe të nesërmen, kjo është domethënia e mbledhjes së opozitës së bashkuar në Shkodër.
Në më pak se tre muaj në këtë qytet kanë ndodhur 6 vrasje dhe janë rrëmbyer dy persona. Ndërkohë që nga media, raportohet se para një jave janë rrëmbyer edhe dy fëmijë, si pjesë e skemave mafioze, që janë rikthyer në familje, pasi mafia ka arritur qëllimin e gjobëvënies. Kjo është situata në Shkodër. Këtu nuk duhet të ishim ulur vetëm ne, por edhe Rama dhe jo për të shitur mend dhe batuta por për të raportuar arrestimin e keqbërësve tash 6 muaj.
Por Rama nuk mund të jetë këtu, ai është në Tiranë, me Cyrben, Ballën, Xhafën dhe shumë të tjerë të faktuar si të lidhur me krimin. Kjo është arsyeja e dytë pse opozita mblidhet këtu. Rama bashkëpunoi me krimin në Shkodër, me familjen Baraj në Dobrac. Rama është një kryeministër në letër. Para disa ditësh krimi goditi shtëpinë ku flinin fëmijët e gazetares, sot u kërcënua një tjetër gazetar në Fushë Krujë, janë qëlluar biznesmenë dhe vrarë si Arjan Ferracaku, situata është totalisht jashtë kontrollit.
Situatën e kontrollon krimi. Sot është shtetrrethim kriminal. Në Shkodër nuk lëvizet lirisht, si të jemi në gjendje lufte, shteti dhe policia janë në gjunjë para tyre. Kam një thirrje për drejtorin e qarkut, jep dorëheqjen pasi në të kundër do të jesh njëlloj përgjegjës, nëse nuk ta mban të mobilizosh policinë kundër tyre, atëherë e vetmja që të shpëton është largimi yt dhe i cdo oficeri tjetër që nuk zbaton ligjin. Si mund ti kërkohet opozitës të bëj ligje me Xhafën, kur duhet të ishte në hetim.
Si mund të bëjmë reforma me Cyrben, anëtarin e vetëshpallur të Shullazit dhe Lul Berishës, apo të negocioj me Ballën. Vendi ynë nuk mund të jetë parlamenti, por pranë qytetarëve që janë të kërcënuar. Shprehim mbështetjen totale për Shkodrën dhe për të shprehur vendosmërinë për të gjitha masat sot dhe nesër me besimin e qytetarëve për të çmontuar organizatat mafioze që kanë marrë peng të gjithë Shqipërinë.
Vendimi i Partisë Demokratike vjen pas një seri ngjarjesh kriminale të ndodhura në dy muajt e fundit në Shkodër. Në dy muaj, në Shkodër ka 6 të vrarë dhe 2 të zhdukur, ngjarje këto ende pa autorë dhe të pazbardhura. Demokratët akuzojnë qeverinë si të lidhur me bandat e Shkodrës. Opozita pretendon se është qeveria që i mbështet këto banda.Mbetet për t’u parë cila do të jetë forma e organizimit të takimit të PD-së në Shkodër, pasi ende nuk dihet nëse takimi i PD-së, do të zhvillohet me degën lokale, apo me qytetarët e Shkodrës.