Detaje të reja dalin në dritë një ditë pas krimit të rëndë ndodhur në Dobraç të Shkodrës ku ekzekutua me kallashnikov biznesmeni 30-vjeçar Arjan Ferracaku. Të dhënat e fundit kanë ndryshuar totalisht rrjedhën e hetimeve. Grupi hetimor ka ngritur dyshimet se ai është vrarë gabimisht pasi nuk ka qenë objektiv i autorit të krimit.
Në momentet e krimit, biznesmeni i njohur shkodran ndodhej me 5-6 persona të tjerë të cilët shpëtuan pa asnjë lëndim. Ata u larguan me vrap për t’i shpëtuar breshërisë së plumbave.
Biznesmeni është goditur nga një largësi prej 70-80 metrash. Sipas burimeve nga policia ai ishte fshehur pas disa shkurreve dhe ka hapur zjarr sapo personat janë afruar.
Grupi hetimor dyshon se objektiv ka qenë një prej personave të tjerë pasi biznesmeni rezulton person i pastër dhe pa probleme. Ai gëzon reputacion në Shkodër dhe nuk ka precedentë penalë.
Raportohet se janë marrë në pyetje personat që ndodheshin me biznesmenin por nuk jepen të dhëna për dëshmitë e tyre. Deri tani janë shoqëruar të paktën 10 persona që mund të japin informacione të vlefshme për zbardhjen e krimit.
