Kryeministri Edi Rama sulmoi sot nga Vlora veten e tij, lidhur me çështjen e aeroportit të Vlorës. Prej dy vitesh, Rama ka deklaruar disa herë se puna për nisjen e punimeve për ndërtimin e aeroportit të ri është shumë pranë, madje ka dhënë edhe afate kur do të nisin fluturimet. Fillimisht tha në vitin 2020, më pas e shtyu për në mesin e 2021-t, por e vërteta është se Rama nuk e ka idenë se kur do të nisin vërtetë fluturimet.
Kryeministri tha sot se “negociatat për marrëveshjen për aeroportin e Vlorës vijojnë ende” dhe qëllimi është që nga kontrata të merret maksimumi.
“Jemi në proces negociatash. Ndryshe nga sa u propagandua nuk ishte një pazar i mbyllur, por është një negociatë e vështirë sepse ne duam të marrim maksimumin për interesin publik dhe të shtetit. Jam besimplotë se do e mbyllim negociatën dhe do të fillojmë punën”, u shpreh sot Rama.
Por ja çfarë ka deklaruar vetë kryeministri Edi Rama për këtë çështje në disa raste të tjera:
30 janar 2018: “Po me aeroportin e Vlorës çfarë kanë që votojnë kundër? 100 mln EU investim 1000 të punësuar të përhershëm superimpakt ekonomik! JO duan çizme.”
13 qershor 2018: “Për sa i përket aeroportit të ri ndërkombëtar në Vlorë, ne jemi në një fazë të avancuar negociatash bazuar në legjislacionin e Republikës së Shqipërisë dhe synimi është që aeroporti të jetë gati përpara fundit të vitit 2020.”
23 qershor 2018: “Në muajt në vijim do të fillojmë ndërtimin e aeroportit. Aeroporti në vetvete kërkon mbi 1000 forca pune. Nëse direkt në aeroport do të ketë mbi 1000 punësime, për shkak të aeroportit vlerësohet botërisht se rritja e punësimit është 1 me 27.”
