Nga Boldnews.al
Burime informale nga Prokuroria “trafikuan” në media gjatë ditës së Martë se kishin nisur verifikimet për zv.kryetarin aktual të Komisionit Qendror të Zgjedhjeve, Denar Biba. Shkak, sipas këtyre burimeve ishte publikimi i një materiali audio, në të cilin Biba, në vitin 2014, shantazhonte gjyqtarin e Strasburgut, Ledi Bianku, duke i kërkuar që të ndërhynte te Presidenti i asaj gjykate për të pezulluar gjykimet për pronat, të cilat ishin në shqyrtim atje, bazuar në ankimet e qytetarëve shqiptarë.
Ky material audio shkaktoi furtunë në opinion politik dhe publik në Shqipëri. Kryetari i Partisë Demokratike, Lulzim Basha, e konsideroi “akt mafioz”, Biba vetë e konsideroi “të manipuluar”, ndërsa numri dy i socialistëve, Taulant Balla e konsideroi “sajesë të opozitës”.
Në këtë luftë deklaratash, “ndërhyri” Prokuroria. Gjatë ditës, burime të saj deklaruan se kanë nisur verifikimet për rastin. Ky deklarim i Prokurorisë së drejtuar nga Arta Marku, gjithnjë nëse është i vërtetë, krijon shumë pikëpyetje.
Së pari, informacioni për nisjen e verifikimit është konfirmuar nga “burime jozyrtare”. Në rastet më normale, Prokuroria mund të publikonte një qëndrim zyrtar, të shpërndarë për mediat, por edhe të publikuar në faqen e saj të internetit. Rreth 24 orë pas informacionit për nisjen e verifikimit, asnjë media në Shqipëri nuk e ka konfirmuar zyrtarisht këtë lajm. Pra, pikëpyetja e parë është-a ka nisur vërtetë verifikimin (hetimin) Prokuroria?
Së dyti, nëse për një çast pranohet se Prokuroria ka nisur verifikimin, atëherë ka shumë gjëra që çalojnë. Për çfarë vepre penale po kryen verifikimet Prokuroria? Juristët janë të ndarë në mendimin se Biba duhet të hetohet për veprat penale të “ushtrimit të ndikimit të paligjshëm” dhe “korrupsionit aktiv të gjyqtarëve të huaj”, për faktin se Ledi Bianku është funksionar i Gjykatës Europiane të të Drejtave të Njeriut (Strasburgut). Gjithësesi, këto mbeten vetëm opinione juristësh, për sa kohë, Prokuroria, e cila deklaron “jozyrtarisht” se ka nisur verifikimin, nuk shprehet se për cilën vepër dyshon.
Së treti, duke pranuar gjithnjë se Prokuroria ka nisur verifikimet, atëherë pyetja vijuese është: Cila Prokurori po kryen verifikimet? Nëse hetimet do të kryhen për “ushtrim ndikimi të paligjshëm”, atëherë kompetente do të jetë Prokuroria e Tiranës. Nëse do të kryhen hetime për “korrupsion aktiv ndaj gjyqtarit të huaj”, kompetente për hetimin e Denar Bibës do të jetë Prokuroria për Krime të Rënda. Por, në informacionin “e trafikuar” në media për nisjen e verifikimit për rastin, nuk përcaktohet se cila Prokurori ka nisur të kryejë veprimet.
Këto pikëpyetje proceduriale krijojnë dyshime të forta se Arta Marku po tenton të sfumojë rolin e saj tërësisht inaktiv kur gjendet përballë eksponentëve të Partisë Socialiste. Në rastin konkret, pavarësisht kundërshtive publike të Denar Bibës, fakti i ndërhyrjes së paligjshme ndaj Ledi Biankut qëndron.
Ky i fundit, në prononcime për media, ka pranuar se është zhvilluar një bisedë e dyshimtë me Denar Bibën. Madje, është aq e vërtetë ky shantazh i qeverisë, nëpërmjet gojës së Bibës, saqë Bianku, sipas deklarimeve të tij, ka njoftuar menjëherë Presidentin e Gjykatës së Strasburgut për “ndërhyrjen e papërshtatshme” nga ana e qeverisë shqiptare.
Në bazë të Kodit të Etikës së Gjykatës së Strasburgut, çdo gjyqtar duhet të shmangë konfliktin e interesit, si edhe duhet të raportojë menjëherë çdo ndërhyrje nga palë të ndryshme për vendimmarrje të caktuara.
Pra, baza për nisjen e hetimit është mëse e mjaftueshme. Por, duhet vetëm vullneti i Prokurorisë së drejtuar nga Arta Marku, e cila, siç po ndodh rëndom në mandatin e saj të përkohshëm, ka zgjedhur që të qëndrojë e tërhequr dhe të mos krijojë asnjë kokëçarje për zyrtarët socialistë.
